الثلاثاء، 18 يونيو 2013

تخيل


تخيل لو كل واحد فى مصر شاف شغله وبدأ فى تنفيذه بجد هيبقى ايه حالنا ؟
تخيل لو الدولة بقت على قلب رجل واحد هيبقى ايه حالنا ؟
تخيل لو الرئاسة بذلت جهود أكثر فى محاولة القضاء على أسباب المشكلات من جذورها هيبقى ايه حالنا ؟ تخيل لو كل الوزراء بيشتغلوا وفقا لخطط موضوعة وكل واحد بيكمل على شغل اللى سبقه هنوفر أد أيه فى كم الاهدار والاسراف فى الاموال والاوقات والجهود وهيبقى حال مصرنا ايه ؟
تخيل لو عندنا معارضة بجد هدفها مصلحة البلد مش كرسى ولا سلطة ولا غيره هيبقى ايه حالنا ؟


تخيل لو كل صحيفة أو قناة نشرت أو اشاعت خبر كاذب وتم معاقبتها بغرامة أو بايقاف أو منع بث لمدد مؤقته حسب قدر الجرم تفتكروا هيفكروا ينشروا اى خبر او اشاعة تانى لمجرد نشر فتن فى المجتمع ؟


تخيل لو عندنا اعلام رسالته اكمال دور الدولة ومساعدة كل مؤسساتها فى البناء والتنمية والقضاء على المشاكل هيبقى ايه حالنا ؟
تخيل لو عندنا قضاء العدل هو أساس حكمه مش المصالح والمطامع هيبقى ايه حالنا ؟
تخيل لو المناصب عندنا بتروح للى بيستحقها بجدارته وكفاءته مش بحزبه وجماعته هيبقى ايه حالنا ؟ تخيل لو كل واحد فى منصب عرف واجباته قبل حقوقه واشتغل بجد عشان عارف انه مش هيحصل على اى من حقوقه الا بعد اداء واجباته مسبقا هيبقى ايه حالنا ؟


تخيل لو كل واحد سرق أو روع أو بلطج أو تحرش أو قطع طريق أو قتل أو خرب أو أفسد سواء فى الناحية الثقافية او الادبية او العلمية أو الفنية أو الرياضية مش فى النواحى المادية والادارية بس وعرف أنه هيتعاقب على فعله دا كان هيعمله ؟
تخيل لو كل واحد فين شاف حاجة غلط وراح للى بيعملها ونصحه بكلمة طيبة ووجه باسم هيبقى ايه حالنا ؟
تخيل لو حبينا البلد دى بجد ايه اللى ممكن نعمله عشانها تخيل ؟
تخيل لو قابلت ربك وانت قاتل او مقتول او ظالم او مظلوم وانت بتخون او بتعتدى على اخوك لمطامع فى سلطة او فى كرسى او فى شوية فلوس او فى لمسة شهرة او فى قرب من مسئول أو غيره أو غيره ايه هيكون شكلك ؟
طب تخيل لو اللى انت رفعت ايدك وسلاحك عليه هو فعلا ابنك او اخوك او ابوك او اختك هترفع عينك فيهم ازاى تخيل ؟


تخيل لو اللى بتعريها او بتتحرش بيها او بتمد ايدك او عينك او بتسئ لها بالألفاظ دى هى بنتك أو امك أو اختك أو مراتك ممكن تعمل ايه مع اللى عمل معها كدا ؟
تخيل المواقف اللى ممكن تحصل فى الوقت دا ولسه قدام الكل فرصة قبل ما تحصل يراجع نفسه ويفكر يا ترى اللى بيعمله دا هيبقى صح ولا غلط ونتايجه ايه وايه هيكون رده على اولاده واهله واقاربه واصدقاؤه وجيرانه وبعد عمر طويل ربنا لما يسأله عن اليوم دا ؟
تخيل نفسك وشوف اجابتك وساعتها خد قرارك بنفس مطمئنة .

3 رأيك يهمنى:

لــــ زهــــــراء ــــولا يقول...

تخيلت معاك لما كل واحد يعمل اللي عليه ويشتغل وفق الخطط المرسومة ليه
تخيلت كل المعارضة في بلدي هدفها اعلاء الحق ولا شئ غير الحق دون النظر لكرسي ولا سلطة ولا حكم ولا ولا ولا
تخيلت ولاقيت مصر كانت هتبقى احسن بلد في الدنيا لكن للأسف هيبقى برضة مجرد تخيل!!!
لا احد يسمع ولا حياة لمن تنادي

* سلملي على حبيب عمتوووو كتيييييييييييييييييييييييييير يارب تشوفه احسن واحد في الدنيا (:



لـــولا

لــــ زهــــــراء ــــولا يقول...

تخيلت ان عندنا اعلام بيقول الحق الحق وبس لله عشان مصر بدون كذب ولا ضلال ولا باطل كان هيبقى حالنا احسن حال


تخيلت اللي بيسرق او بينهب بيراجع ضميره

تخيلت ان الي بيقول كلمة بيراجع نفسه لان كلمته ممكن يسيل وراها دماء طاهرة هيتسأل عنها يوم القيامة اول ما يحاسب عليه يوم القيامة في الدماء ولو تحريض بكلمة ادت لقتل او سفك دم


تخيلت ان اللي بيتحرش بيقول مقدرش دي اختي دي امي دي خالتي دي عمتي


تخيلت مصر هتكون احلى



لولا برضه

Casper يقول...

عندي قناعة على ان الحل هو ابدا نفسك
كل ما اقول لحد ما تعمل كذا يقولي يعم ما غيري بيعمل هيا جت عليا أنا ؟!