الجمعة، 26 نوفمبر 2010

جربت تحب مصر

بسأل بجد جربت تحب مصر هتقولى طب يا سيدى مصر فيها ايه يتحب دلوقتى انا بتكلم عن اللى عنده شك ان ممكن ميكونش بيحب مصر لكن اللى غرقان فى حبها مالوش علاقة بكلامنا عشان ميزعلش مننا .عموما خلينى عاك يا سيدى قوله اللى عندك . ماشى هقول اسمع يا سيدى :- نقطتين ومن اول السطر فاضى تعد
يا راجل دا احنا بيطلع عنينا وعين اهلنا لحد ما نتعلم دا فى حال اننا اتوفر لنا فرصة اننا نتعلم واتظبطت اهالينا وطلعت روحهم فى المصاريف والدروس الخصوصية والمشاركة فى دهان المدرسة واثاث المدرسة وفرح بنت الناظر وبعد دا كله نتخرج من الجامعة زى كتير من اللى بيتخروا يقولوا اللى انتو اتعلمتوه فى الجامعة مالوش علاقة بالشغل . ماشى اتخرجنا طب يالاه بأه معايا ندور على شغل يوم ورا التانى كعوب رجلينا اتفتحت من كتر التدوير يا راجل الواحد من كتر ما بيدور على شغل مبقاش عنده وقت يشتغل يااااااااااااااه اخيرا فى فرصة شغل اجرى الحق تروح يا ابنى الوظيفة اللى عندنا عبارة عن .............. طب حضرتك انا خريج .......... والله يا ابنى هو دا اللى عندنا وصدقنى كان نفسى اساعدك بس هودا المتاح عندنا ما باليد حيله . متشكر لحضرتك واسف انى ازعجتك ولا يهمك يا ابنى طب اكمل وادور تانى مش لازم ايأس ايوه انا فاكر كانوا بيعلمونا لا يأس مع الحياه ولا حياة مع اليأس عموما انا هدور فى كل مكان وهضحى بالمجال مش عاوز اشتغل فيه انا سمعت ان فلان ممكن يساعدك انك تشتغل فى مكان كويس ايوة بس دا بياخد الشئ الفلانى ايوة بس انا من الاوائل بص يا ابنى شهادتك دى بلها واشرب ميتها ايوة بس انا كان ليا حق التعيين فى الجامعه ايوة دى حقيقة بس القسم اللى انت متخرج منه مش محتاج السنة دى وهيكون لك اولوية فى حالة حاجة القسم فى السنين اللى جاية ان شاء الله يا ابنى يووووووووووووووووه . فى واحد صاحبى مقابلنى لما اسأله انت بتشتغل فين انا بشتغل فى مطعم .............. مطعم بعد كل التعليم والتعب دا مطعم هو انا لوحدى وانا الدكتور............... والمهندس ................. والمحاسب ...............والمدرس ............ كلنا بنشتغل هناك واصحابنا التانيين اللى فى شرم والغردقة وبيشتغلوا زينا هنعمل ايه مش احسن ما نسرق او ننهب او نمد ايدينا كفايه على اهلنا اللى شافوا لحد كدا ولا نقعد فى بيتنا حاطين ايدينا على خدنا ونستنى بيت العدل ولا ايه ..............
اكمل معاك انا فكرت مثلا اسافر بره بس هجيب الفلوس منين وكل حتة عاوزة الشئ الفلانى يا اخى دا الواحد من كتر ما زهق قال يشتغل فى كل حاجة له فيها او مالوش عد يا سيدى نصلح تكييفات ممكن


اقولك ايه بس اشتغل على عربية كبده اشتغلت


لا دا انا كمان قلت اشتغل فى بنزينة

مش بقولك سبع صنايع
طب اكمل معاك لو لاقيت شغلك فى مجالك فى بلدك وفى تخصصك وتروح تقدم تلاقيهم يفضلوا عليك اى واحد مش مصرى يعنى العمالة الهنود او البنجلاديش او الصينين بيفضلوهم عن المصريين لحد ما بقينا غرب فى بلدنا ولما تسألهم يقولول لك اشطر وبياخدوا اقل طب جربونا يا سيدى يمكن نطلع احسن واحنا كمان بنرض بالقليل بس يجى .
اقولك حاجة تانية شوف المصرى بيتعامل ازاى فى مصر وغير المصرى بيتعامل ازاى فى مصر وهسيبك انت تحكم وطبعا كلنا عارفين الحكم والكلام دا فى مصر ما بالك بقا بره مصر لما تكون انت مصرى وبتتعامل كدا فى بلدك عاوزهم بره يعاملونا ازاى اقولك من الاخر عشان متتعبش نفسك معايا احنا هانت علينا نفسنا عشان كدا بقينا هينين فى عنين الناس .
ممكن تسيب لى فرصة ارد انت خد البوست كله لحسابك .......................... رد يا سيدى سمعنى كلى اذان صاغية
طيب انا عارف ان كل اللى هقوله مجرد كلام بس انا نفسى تحسه ..... احسه ؟ طيب قول يا عم
جربت تبعد عن ابوك وامك واخواتك ا ترى حسيت بايه فى اول مرة بعدت عنهم ؟ اكيد كان احساس مر وتبقى تتمنى الوقت اللى انت بتقضيه بعيد عنهم يعدى عشان ترجع لهم بسرعة وتفضل تعد الدقايق والثوانى عشان نفسك ترجع لهم                صح ولا.
طيب متعبتش مرة وانت بعيد عنهم وافتكرت لو انت فى نفس الحالة وانت وسطهم مامتك بتكون سهرانة بيك ازاى ووالدك بيمسح على راسك ازاى واخواتك بيدعوا لك ازاى           موحشتكش .
طيب يا ترى قضيت اى عيد بعيد عنهم طب لاقيت له طعم بجد حسيت بطعم اى فرحة وانت بعيد عنهم اصحابك جيرانك ولاد حتتك كل اللى حواليك كل شارع كل حارة كل محل وكل كشك كل طفل وكل بنت كل راجل وكل ست كل نفس كل صوت مبيوحشكش لما بتبعد .
يا ابنى كل لحظة بنعيشها فى البلد دى بتنحت جوانا ذكريات عمرك ما تقدر تغيرها الا لما تخرج من جلدك عمرك ما هتحس بالدفا فى اى مكان تانى زى ما عمرك ما هترتاح فى حضن حد زى امك هى دى مصر مهما نشوف منها بردوا بنحبها حتى لو قلنا غير كدا عموما جرب تحب مصر ولو مش قادر تحبها يبقى العيب فيك مش فى مصر




الثلاثاء، 23 نوفمبر 2010

بتحس بايه

بتحس بإيه لما تلاقى الناس كلها همها بقا كورة شغلها بقا كورة فكرها بقا كورة بتنام كورة بتصحى فى كورة كأنهم بطلوا شغل وفضيوا لكورة دا ندية خسران دا ناديه كسبان دا مش عاجبه اللعب ولا اللاعيبة ولا التدريب ولا الملعب ولا الجماهير ولا حتى نفسه ولا حتى عارف مش عاجبه ايه ...........................
بتحس بايه لما تلاقى التبرعات مبقتش للغلابة ولا المساكين ولا الفقراء ولا المحتاجين ولا من بلادهم مطرودين ولا حتى عابرى السبيل ولا حتى المدراس ولا المستشفيات ولا الطرق ولا حتى الكبارى وبقت لفريق كورة ......................
بتحس بايه لما تلاقى ناس بتدور على قوتها ومش لاقيها على شربة مياه ومش لاقياها على هدمة قديمة تغطى جلودهم ومش لاقياها على عشة تداريهم ومش لاقياها وناس تانية فى منتجعات وشاليهات وفيلات ومن دا لـــــــ دا يا قلبى لا تحزن
بتحس بايه لما تبقى ماشى فى الشارع لا بيك ولا عليك وتبص حواليك عادى زى اى حد ماشى فى الشارع وبيبص حواليه وتاخد عينك يافطه كبيرة قوى يااااااااااااااااااااه اكيد فيها حاجة مهمة بسرعة اقرأ وتقراااا وتلاقى اللى مكتوب وحشتنا يا ................. وياريته لحد مهم دكتور زويل مثلا حد عمل حاجة مهمة للبلد مثلا دا لواحد من اللى ......................
بتحس بايه لما تلاقى بنات فى الشارع فى عز الظهر عادى بيحصلهم حاجات تحرش  عادى اغتصاب عادى سرقة عادى سب عادى تشويه عادى ناس ماشية ونسيت هدومها ف البيت عادى زبالة فى كل حتة عادى يااااااااااااااااااااااااااااااااااه........
تحس بايه لو انت ف مستشفى بتزور حد تعبان وتلاقى حد جاى يجرى عليك بسرعة يا جماعة بعد اذنكم حد يدينى مكالمة معلش انا اسف مش معايا رصيد اى حد يدينى مكالمة بسرعة لو سمحتم دا حياة او موت وانت لا بيك ولا عليك تديله موبايلك وفجأة ياخده ويجرى .............ياااااااااااااااااااااااااااه طب لو كنت فى الشارع ووقفت جنبك عربية وتسألت على مكان وقلت له الوصف وقالك طب ممكن مكالمة وبرضه طلعت موبايلك اللى انت اشتريته مكان اللى ضاع التانى وتديه له وبردوا يخدوا ويجرى تحس بايه .........
بتحس بايه لما تشوف الاطفال بدل ما فى المدارس يعلموهم لا يغتصبوهم ياااااااااااااااه طب وشوية تعذيب كمان ومفيش مانع من التحرش وشوية الفاظ من اللى بيقولوا عليها بيئة ياااااااااااااااااه دا حتى البيئة مرحمنهاش .
طب لما تشوف نفس الاطفال دول فى الشارع بيدخنوا ويشربوا مخدرات وكل انواع السم قصدى الكيف ساعتها تحس بايه
طب قولى تحس بايه فى دى اساتذة جامعة واطباء ومهندسين ومدرسين ومحاسبين وغيرهم وغيرهم مش لاقيين شغل ولما يشتغلوا تلاقى مرتباتهم يادوب بدل شحاته اقصد بدل ما يموتوا من الجوع وف نفس الوقت يطلع لك مغنى يقولك انا هاخد ع الفيلم دا بتاع 80 مليون مثلا والتانى ياخد على المسلسل زيهم واللاعب فى الموسم يجى 5 مليون دا اساسى غير البدلات قولى ساعتها تحس بايه .........

برجاء  التعليق من كل من يقرأ الموضوع فتعليقاتكم تفيدنى

الاثنين، 22 نوفمبر 2010

من انا

أعجبنى موضوع قرأته فى مدونة فضاء ليلة تحت عنوان أزمة هوية مرفق به الصورة المدرجة اعلاه وكانت لى رغبة فى الكتابه عن هذا الموضوع من جهات اخرى فلى خواطر حولها أبسطها اليكم ربما هناك من يشاركنى او يعارضنى او يفيدنى او يستفيد منى فاقرأوا
هناك الكثير ممن يعيش فى هذه الحياه اذا لاقيته تجده وكأنه تائها لا يعرف وجهته الى اين يسير الى اى ينتمى فتجدده مشتت بين الاوطان ربما يكون مغرب لأسباب كثيرة ربما عدم الامان فى الوطن ربما البحث عن سبل المعيشة ربما طالبا للعلم ربما ساعيا نحو المال ربما هاربا من مبادئ وافكار وعادات وسلوكيات واخر تجده مشتت بين الناس لا يعرف ماذا يعمل لا يعرف كيف يصل يملك الكثير دون ملكية المحرك لذلك لا يعرف كيف يخطو نحو الصحيح واخر مشتت بين الشهوات من شهوة لأخرى ومن مستنقع لأخر كالتائه وسط البحر تلاطمه الامواج هذه تقربه وتلك تبعده واخر من حوله افقدوه ثقته بنفسه وبقدراته كل ما يفكر به الوحده الهرب
كلها ليست مبررات فالمؤمن كيس فطن مهما ابتعد عن وطنه فليس ببعيد فوطنه الايمان غايته الجنه سبيله سبيل النبى يعرف ما يريد ربما تغره الدنيا لكن يرده معتقده فلا تأخذك عدم قدرتك على تحديد هويتك الى ما قد يضرك

السبت، 20 نوفمبر 2010

مش مجرد وقت

السلام عليكم
وبسرعة رجعت لكم تانى ويارب متكونوش اتخنقتم منى بس المرة دى الموضوع مختلف
كل واحد فينا عنده حاجات جواه  ممكن تكون حلوة وبيعش دايما بيها وممكن تكون مرة ونفسى يوم يطويها
كل لحظة بتعدى علينا بتطبع فينا صورة وبتكتب جوانا ذكرى    كتير بنفتكرها ونسرح معها وكتير بننسى نفسنا ونتمنى اللحظات دى ترجع تانى واوقات تانية بنتضايق ونندم على الحاجة دية ونتمنى انها تتمسح من عقولنا ومن قلوبنا ومن كل حياتنا هى كدا الحياة
مش ممكن تنسى اول حد عرفته ومش ممكن تنسى حد أساء لك كتير بس ياريت تسامح يا اخى ادفع بالتى هى أحسن وحاول تفتكر الذكريات الجميلة المهم فى كل موقف يعدى اننا نقدر نتعلم منه بجد عشان منتعرضش لنفس المشاكل او المواقف مرة تانية ولو اتعرضنالها ساعتها نحسن التصرف .
كتير بتقعد مع نفسك تراجع شريط حياتك ياااااااااااااااااااااااااااااااااااه انا كنت فين وبقيت فين بتفتكر اوقات كتير مرت عليك تعبت فيها عانيت فيها شقيت فيها لحد ما وصلت بتفرح والفرحة تطير من عنيك لما تلاقى تعبك بفايدة طبيعى انت حققت حلمك بتوفيق ربنا ( إن الله لا يضيع أجر من أحسن عملا ) ساعتها كل شئ كل معاناه كل ألم بيهون . كان دايما والدى بيقولى يا ابنى تعب النهار بيطويه النوم بالليل وبتصحى تانى يوم بصحة جديدة وعمر جديد ومش حاسس بأى تعب .
لما تفتكر السهر والمذاكرة والشاى الكتير والقهوة والصحاب فى مراحل التعليم المختلفة من ثانوى لحد جامعه ولو كملت دراسات تانية بتختلف معاك الامور شوية .
تعرفوا انا اكتر وقت ذاكرت فيه فى حياتى كان وقت الجامعه كنت بذاكر كتير جدا لانى بحب العلم والتعليم كنت دايما بخلى ليا اهداف بديلة كنت اتمنى اكمل واكون دكتور فى الجامعه مش لحاجة غير انى كنت بحب اعلم الناس وبفرح جدا لما اعرف اعلم حد ولما اعمل الموضوع دا لكن ارادة ربنا كانت غير كدا  كان دايما ايمانى بربنا بيخلينا ما ازعلش على حلم محققتوش اكيد فى خير فى غيره كان دايما لما حد يسألنى اقوله خلى لك خيارات بديلة عشان لو محققتش حاجة متزعلش وتبص لغيرها متبنيش املك على حاجة واحدة
المهم عشان تستفيد من اى مرحلة متعديهاش الا لما تقف مع نفسك وتقيم انا كنت فين ووصلت لفين وعاوز اوصل لايه دى طريقة تفكير وتقييم  
بتمشى دايما الايام بينا ما هو دا العمر بسرعة بيعدى وتملى بيجرى بتتنقل من خطوة لخطوة ومن رحلة لرحلة ما هى الحياة رحلات ممكن فى كتابات تانية نحكيها تفصيلى بس شوية بشوية
خلاصة الموضوع متخليش موقف يعدى من غير استفادة وبص دايما فى اللى بتعمله ما هو مش مجرد وقت

وحشتونى

السلام عليكم
رجعنا تانى بعد العيد والحمد لله عيدنا على حبايبنا واتمنى ان حضاراتكم كمان تكونوا عيدتم على الجميع ورضيتم ربكم ومسحتوا كل دمعة واشرقتم الف بسمة وساعدتم كل محتاج .
يا ترى امنياتكم لايه لبعد العيد
اكيد كل واحد رجع لشغله وكل واحد فينا عنده همومه ومسئولياته اتمنى اننا فى وسط كل همومنا مشاكلنا مشاغلنا مننساش بعض
احنا أمة واحدة احنا ايد واحدة لا فرق لعربى على أعجمى إلا بالتقوى والعمل الصالح مينفعاش نسيب بعض لو اتفككنا هيبقى هو دا مراد اعداءنا     خلوا بالكم الطريق طويل

الجمعة، 12 نوفمبر 2010

العيد قرب

السلام عليكم
العيد قرب وكل سنة انتم طيبين وفرحانين ومبسوطين ومحققين كل امانيكم والدنيا بتضحك لينا وليكم وتملو كل حياتكم افراح وابتسامات وورود وتنورا لغيركم طريقهم
بسرعة قوم لو حد زعلان منك خلى قلبك كبير وصالحه انت حتى لو كان هو اللى غلطان عايزين العيد يجى وكلنا متماسكين بناخد بإيدين بعض مش عايزين حد يفرقنا عايزين قلوبنا ترقص من الفرح والحب لاخواتنا واهلنا وكل اللى عايشين جنبنا

متنسوش فى العيد ترسموا بسمه على وش كل طفل يتيم وكمان متنسوش الارامل والفقراء ومتنسوش كل حد محتاج لكم ومتنسوش تدعوا لاخوانكم المسلمين فى كل مكان .
متنسوش صلة الارحام متنسوش تقدموا لاخوانكم واخواتكم واولادكم وزوجاتكم وابائكم وامهاتكم وردة وفرحة وبسمة عشان العيد

عيدكم مبارك وكل عام وانتم بخير وتقبل الله منا ومنكم صالح الاعمال ومتنسوش اللى بيحبوكم فى دعائكم
والى لقاء والسلام عليكم

الثلاثاء، 9 نوفمبر 2010

من اقوال الحكماء

أربع من سلم منها ملك نفسه: العجلة – التواني – اللجاجة – العجب
أربع تقبح وهي في أربع أقبح: البخل في الأغنياء، والفحش في النساء، والكذب في القضاء، والظلم في الحكام.
ثلاثة لا يعرفون إلا في ثلاثة مواطن: الحليم عند الغضب، والشجاع في الحرب، والأخ عند الحاجة.
كن على حذر من الكريم إذا أهنته، ومن العاقل إذا أحرجته، ومن اللئيم إذا أكرمته، ومن الأحمق إذا مازحته
يا بني ذقت الطيبات كلها..فلم أجد أطيب من العافية..وذقت المرارات كلها..فلم أجد أمر من الحاجة إلي الناس..ونقلت الحديد والصخر..فلم أجد أثقل من الدين.
النفس تجزع أن تكون فقيرة، والفقر خير من غنى يطغيها، وغنى النفوس هو الكفاف فإن أبت فجميع ما في الأرض لا يكفيها.
من استخف بالعلماء أضاع دينه..ومن استخف بأولي الأمر أضاع دنياه..ومن استخف بالأخوان أضاع مروءته.
قال أحد الحكماء لابنه في موعظة: يا بني .. إذا أردت أن تصاحب رجلاً فأغضبه ..فإن أنصفك من نفسه فلا تدع صحبته .. وإلا فاحذره !
من زاد في حبه لنفسه ... زاد كره الناس له
اللسان ليس عظاماً ...لكنه يكسر العـظام
نمرٌ مفترس أمامك .. خير من ذئب خائن وراءك
تعلم من الزهرة البشاشة، ومن الحمامة الوداعة، ومن النحلة النظام، ومن النملة العمل، ومن الديك النهوض باكراً
قالو عن الصبر:
الصبر ..عند المصيبة .. يسمى ايماناً
الصبر.. عند الاكل .. يسمى قناعة
الصبر.. عند حفظ السر .. يسمى كتماناً
الصبر.. من اجل الصداقة .. يسمى وفاء
نقلا عن مصراوى

السبت، 6 نوفمبر 2010

متعيش لوحدك

احيانا تحب تتكلم
تحكى عن اللى جواك
يبقى فى نفسك تلاقى اللى بترتاح له عشان تتكلم معاه  
يا ترى هتلاقيه ولا ايه  بتلاقى هموم كتير محوطاك  ومشاكل
حتى ممكن تكون حاجة كويسة اللى عاوز تفضفض بيها  مش مهم هى ايه
المهم عاوز تتكلم وخلاص  تتطلع كل اللى جواك   زى ما يكون  المهم تريح نفسك تحس ان غيرك معاك مشاركك احساسك مش لوحدك قدام اى حاجة بتقابلك .
لما تلاقيه بتطمن  لما تحكى له بترتاح وما يعيش معاك بتفرح ولما بيساعدك بتطيرررررررررررر من الفرح
خليك دايما جنب غيرك
متعيش لوحدك

الجمعة، 5 نوفمبر 2010

بتشوفها ازاى

فى معانى كتير قوى حلوة حوالينا محتاجة مننا اننا نبص بس حوالينا مجرد نظرة هى نفس النظرة اللى بتبص بها على اى حاجة ممكن تبص لها على انها مشجميلة بس لو دققت وكنت رايق ومش متضايق هتلاقى نظرتك لنفس الحاجة مختلفة تماما يعنى تلاقى ناس بتتضايق من الورد وناس تانية بتعشقه وناس بتحب الزحمه وناس بتتخنق منها وناس بتحب اللمه وناس بتحب الوحدة وناس تحب تساعد وناس تحب تسخن وناس مشغولة بقوتها وناس بتاخدها بصوتها وناس وشوشها بتضحك وناس دموعه كتيرة .
كلها مواقف متناقضة           ممكن لما تحصل لينا احنا حتى نتضايق او نضحك حسب الموقف لما يعدى الوقت وتفتكر نفس الحاجة حتى لو كانت بتبكيك صدقنى هتضحك منها وهتتضايق من نفسك ازاى كان موقفك كدا فيها طب ولو كان موقف كوبيس هتلاقى نفسك مبسوط ودايما بتحكى عليه لكل اللى تعرفه واللى متعرفوش احنا ناس بنحب الحياة .
طب لو مش مصدق بص فى وشوش الناس صحيح ممكن تلاقى كأبة وممكن تلاقى حزن وممكن حد يقولك يا عم انت اتجننت وممكن واحد يشاور لك بايده وممكن واحد يتخانق معاك
طب جرب ماتش كورة يااااااااااااااااااااه الناس كلها ملمومة    جوووووووووووووووول لفريقنا ايه دا الحال اتغير البلد كلها بترقص مبسوطه تحس ان مبقاش فى اى مشاكل مش بقولك اى حاجة ممكن تشوفها بطريقتين بالظبط زى احساس الشتا
جرب كدا وابقى قولى لاقيت ايه سلام وبعدين نرجع ان اراد الله

مجرد كلام

لو انت قاعد فاضى مش عارف تعمل ايه حتى مش عارف بتفكر فى اية
ايه اللى مخليك قاعد متضايق طيب وايه اللى مضايقك ............... فعلا متضايق من غير سبب
مجرد شعور بالخنقة وخلاص طب تفتح التلفزيون                يوووووووووووووووووووه كل حاجه شبه بعضها واللى بيتذاع سمعته بدل المره مليون مرة ؛ تصدق عندك حق تتضايق تجيب قنوات اخبارية تلاقى قتل وحرق وتشريد فى مكان فى العالم تجيب منوعات تلاقى شوية افلام ومسلسلات تافهة ملهاش معنى طب هغير القناة   يااااااااااااااااااااااااااااااااه تانى اعلانات مسابقات تقرف وتجيب الصداع طب اغانى هو فين اللى بيغنى دا كله بيرقص ويخبط ولا حد فاهم حاجة
اهى دى بقا القناة ركز دا بيفسر احلام بيقول عليه عالم ابراج طب يا ترى برج القاهرة منهم يا سيدى دا اخره برج حمام ومش زاجل كمان طب غير بسرعة ....................... بقولك سيبك من ام التلفزيون دا واتشغل باى حاجة تانية ......... فجأة الباب بيدق خير اللهم ما اجعله خير ................. يووووووووووووووووه اهو دا بقا اللى كان ناقص يا عم مش وقتك اشوف وش بعدين اعتبرنى مش هنا بص انا بقيت منك هناك روح يمكن تلاقينى اقولك شوف مين بيرن على موبايلك اهو اى حاجة تيجى من ريحة الحبايب المهم ميكونوش ضاربين سمك او فسيخ عشان الريحة متفوحش يا عم انت بتقول ايه دا واحد انا مش عاوز ارد عليه طب سيبك من دا كله واقفل تليفونك .................... اقولك افتح كتاب ربنا دا ربك بيقول
بسم الله الرحمن الرحيم ( ألا بذكر الله تطمئن القلوب )
تصدق عندك حق سيبنى بقا اعيش وقتى مع ربى           
   وقبل السلام اتأكد ان فى دايما طاقة نور مفتوحة قدامك بس بص حواليك وركز كويس هتلاقى ان الوقت له معانى كتير جدا عندنا دا الوقت هو عمرنا  خلاص سلام وبعدين نرجع ان اراد الله

مجرد صورة

جدد حياة القلب

جدد حياة القلب بالقرآن كي تطمئن الروح بالايمان

 واتلوه بالآناء واستمطر به فيض الرضى وسحائب الغفران ,

نعم الجليس مدى حياتك مصحف يجلو هموم النفس والوجدان

فيه الهداية والسعادة والرضى وهو الدليل لجنة الرحمن ,

اقرا ورتل حاضرا متدبرا وانهل من الايات نور معاني

 لا يلهينك سعي دائب وبه اعتني واحذر من الهجران .


جدد حياة القلب بالقرآن

كي تطمئن الروح بالايمان

 واتلوه بالآناء واستمطر به فيض الرضى وسحائب الغفران ..

ربما يكون

ربما يكون اللون الاسود جميل ولكن الابيض اجمل منه ، ربما يكون لون السماء الرمادى يحرك المشاعر والخيال ولكن لون السماء أصفى فى زرقته ، تعلم ان تبحث عن الصفاء ولو كان لحظة وابحث عن الوفاء ولو كان متعبا وشاقا وتمسك بخيوط الشمس حتى ولو كانت بعيدة ولا تترك قلبك ومشاعرك وأيامك واشياء ضاع زمانها وإذا لم تجد من يسعدك فحاول ان تسعد نفسك واذا لم تجد من يضئ لك قنديلا فلا تبحث عن اخر اطفأه واذا لم تجد من يغرس فى ايامك وردة فلا تسعى لمن غرس فى قلبك سهما ومضى .
ربما يعجبنى تنوع كتابات أجانا كريستى واختلاف يوسف السباعى ومواقف انيس منصور ورؤية غادة السمان ورباعيات صلاح جاهين ووطنية محمود سامى البارودى وتمكن احمد شوقى .
ربما نختلف ربما نلتقى ولكن الاهم ان يكون لك أثر
نمى معارفك
دائما تستطيع ان تصل ما دمت تحاول



الخميس، 4 نوفمبر 2010

النهاردة

النهاردة تانى يوم فى المدونة
يا ترى هيكون شكلها ازاى
مش عارف كل شوية اغير ابدل فى شكلها
عاوز اوصل للشكل اللى هتفضل عليه
كل واحد بياخد وقت كبير على ما يتعلم
المهم انه يتعلم
دى محاولة لاضفاء جديد
ممكن يكون الكلام دا مش هيفيد لكم  بس دا لغرض معين
بجرب بيه حاجة معينه
الانشودة دية جميلة قوى
ياريت تسمعوها واهو كله ثواب مش كلنا محتاجين للثواب

الأربعاء، 3 نوفمبر 2010

من علمهم

نقلا عن صديق

: بك يا زمان اللهو أشكو غربتي***إن كانت الشكوى تداوي مهجتي قلبي تساوره الهموم توجعـــــاً***ويزيد همي إن خلوت بظلمتـــي يا قلب إني قد أتيتك ناصحـــــاً***فاربأ بنفسك أن تقودك محنتــي انا في ابتسامتي عُرِفت ولم أزل*** حتى أتاني ما ينغّص بسمتى إن أسعفتني دمعتي في فرحتـي*** أنزلتها طربا لأرسم بهجتــي أو أسعفتني بالبكاء مـــــــــرارة*** تتسابق العبرات تهجر مقلتــــي واليوم أفرغ دمع عيني بالبكـاء*** ندماً على ما كان مني .. ويلتـــي جفت دموعي من فواجع ما أرى***

جرب تعيش

حلو جدا انك تكون نفسك فى حاجة
والاجمل انك تقدر تعملها
ويا سلام لو لاقيت الحاجة اللى انت عاوزها جاهزة قدامك بسرعة
خلى بالك اوعى تكون الحاجة دية بتضر غيرك
صحيح من حقنا نعيش
بس الاصح ان مش من حقنا نتعدى على حرية غيرنا
خلى حياتك اساها الدين هترتاح بجد

جرب تعيش

رد الفضل لاهله

ترجع فكرة هذه المدونة الى زميلة لى فى العمل لها مدونه مشهورة حدثتنى عنها فأعجبت بفكرتها وأحببت ان يكون لى واحدة اشارككم وتشاركونى فيها ذكرت ذلك لارد الفضل لاهله فلها جزيل الشكر فرسولنا علمنا ان من لم يشكر الناس لم يشكر الله

صورة

البداية

بسم الله الرحمن الرحيم
فى حياة كل منا ما يحب التحدث به حتى لو كان الحديث مع نفسه
فى حياة كل منا اسرار
فى حياة كل منا مواقف
كلنا نتعرض لذلك
نحب مشاركتكم فشاركونا