الجمعة، 26 نوفمبر، 2010

جربت تحب مصر

بسأل بجد جربت تحب مصر هتقولى طب يا سيدى مصر فيها ايه يتحب دلوقتى انا بتكلم عن اللى عنده شك ان ممكن ميكونش بيحب مصر لكن اللى غرقان فى حبها مالوش علاقة بكلامنا عشان ميزعلش مننا .عموما خلينى عاك يا سيدى قوله اللى عندك . ماشى هقول اسمع يا سيدى :- نقطتين ومن اول السطر فاضى تعد
يا راجل دا احنا بيطلع عنينا وعين اهلنا لحد ما نتعلم دا فى حال اننا اتوفر لنا فرصة اننا نتعلم واتظبطت اهالينا وطلعت روحهم فى المصاريف والدروس الخصوصية والمشاركة فى دهان المدرسة واثاث المدرسة وفرح بنت الناظر وبعد دا كله نتخرج من الجامعة زى كتير من اللى بيتخروا يقولوا اللى انتو اتعلمتوه فى الجامعة مالوش علاقة بالشغل . ماشى اتخرجنا طب يالاه بأه معايا ندور على شغل يوم ورا التانى كعوب رجلينا اتفتحت من كتر التدوير يا راجل الواحد من كتر ما بيدور على شغل مبقاش عنده وقت يشتغل يااااااااااااااه اخيرا فى فرصة شغل اجرى الحق تروح يا ابنى الوظيفة اللى عندنا عبارة عن .............. طب حضرتك انا خريج .......... والله يا ابنى هو دا اللى عندنا وصدقنى كان نفسى اساعدك بس هودا المتاح عندنا ما باليد حيله . متشكر لحضرتك واسف انى ازعجتك ولا يهمك يا ابنى طب اكمل وادور تانى مش لازم ايأس ايوه انا فاكر كانوا بيعلمونا لا يأس مع الحياه ولا حياة مع اليأس عموما انا هدور فى كل مكان وهضحى بالمجال مش عاوز اشتغل فيه انا سمعت ان فلان ممكن يساعدك انك تشتغل فى مكان كويس ايوة بس دا بياخد الشئ الفلانى ايوة بس انا من الاوائل بص يا ابنى شهادتك دى بلها واشرب ميتها ايوة بس انا كان ليا حق التعيين فى الجامعه ايوة دى حقيقة بس القسم اللى انت متخرج منه مش محتاج السنة دى وهيكون لك اولوية فى حالة حاجة القسم فى السنين اللى جاية ان شاء الله يا ابنى يووووووووووووووووه . فى واحد صاحبى مقابلنى لما اسأله انت بتشتغل فين انا بشتغل فى مطعم .............. مطعم بعد كل التعليم والتعب دا مطعم هو انا لوحدى وانا الدكتور............... والمهندس ................. والمحاسب ...............والمدرس ............ كلنا بنشتغل هناك واصحابنا التانيين اللى فى شرم والغردقة وبيشتغلوا زينا هنعمل ايه مش احسن ما نسرق او ننهب او نمد ايدينا كفايه على اهلنا اللى شافوا لحد كدا ولا نقعد فى بيتنا حاطين ايدينا على خدنا ونستنى بيت العدل ولا ايه ..............
اكمل معاك انا فكرت مثلا اسافر بره بس هجيب الفلوس منين وكل حتة عاوزة الشئ الفلانى يا اخى دا الواحد من كتر ما زهق قال يشتغل فى كل حاجة له فيها او مالوش عد يا سيدى نصلح تكييفات ممكن


اقولك ايه بس اشتغل على عربية كبده اشتغلت


لا دا انا كمان قلت اشتغل فى بنزينة

مش بقولك سبع صنايع
طب اكمل معاك لو لاقيت شغلك فى مجالك فى بلدك وفى تخصصك وتروح تقدم تلاقيهم يفضلوا عليك اى واحد مش مصرى يعنى العمالة الهنود او البنجلاديش او الصينين بيفضلوهم عن المصريين لحد ما بقينا غرب فى بلدنا ولما تسألهم يقولول لك اشطر وبياخدوا اقل طب جربونا يا سيدى يمكن نطلع احسن واحنا كمان بنرض بالقليل بس يجى .
اقولك حاجة تانية شوف المصرى بيتعامل ازاى فى مصر وغير المصرى بيتعامل ازاى فى مصر وهسيبك انت تحكم وطبعا كلنا عارفين الحكم والكلام دا فى مصر ما بالك بقا بره مصر لما تكون انت مصرى وبتتعامل كدا فى بلدك عاوزهم بره يعاملونا ازاى اقولك من الاخر عشان متتعبش نفسك معايا احنا هانت علينا نفسنا عشان كدا بقينا هينين فى عنين الناس .
ممكن تسيب لى فرصة ارد انت خد البوست كله لحسابك .......................... رد يا سيدى سمعنى كلى اذان صاغية
طيب انا عارف ان كل اللى هقوله مجرد كلام بس انا نفسى تحسه ..... احسه ؟ طيب قول يا عم
جربت تبعد عن ابوك وامك واخواتك ا ترى حسيت بايه فى اول مرة بعدت عنهم ؟ اكيد كان احساس مر وتبقى تتمنى الوقت اللى انت بتقضيه بعيد عنهم يعدى عشان ترجع لهم بسرعة وتفضل تعد الدقايق والثوانى عشان نفسك ترجع لهم                صح ولا.
طيب متعبتش مرة وانت بعيد عنهم وافتكرت لو انت فى نفس الحالة وانت وسطهم مامتك بتكون سهرانة بيك ازاى ووالدك بيمسح على راسك ازاى واخواتك بيدعوا لك ازاى           موحشتكش .
طيب يا ترى قضيت اى عيد بعيد عنهم طب لاقيت له طعم بجد حسيت بطعم اى فرحة وانت بعيد عنهم اصحابك جيرانك ولاد حتتك كل اللى حواليك كل شارع كل حارة كل محل وكل كشك كل طفل وكل بنت كل راجل وكل ست كل نفس كل صوت مبيوحشكش لما بتبعد .
يا ابنى كل لحظة بنعيشها فى البلد دى بتنحت جوانا ذكريات عمرك ما تقدر تغيرها الا لما تخرج من جلدك عمرك ما هتحس بالدفا فى اى مكان تانى زى ما عمرك ما هترتاح فى حضن حد زى امك هى دى مصر مهما نشوف منها بردوا بنحبها حتى لو قلنا غير كدا عموما جرب تحب مصر ولو مش قادر تحبها يبقى العيب فيك مش فى مصر




5 رأيك يهمنى:

promise is promise يقول...

والله العظيم يا شيخ بغبوتها وبقسوتها وبنيلها وناسها اللى بقيوا مش طيبين وبزحمتها التى لاتطاق وكونها مكفرانه ومطلعه عنينا ومشردانا بس تقول ايه

بنحبها !!!

أحمد شريف يقول...

أحسنت بشدة :)

فاروق بن النيل يقول...

بحبها وموش بحبها بحبها وموش بحبها
بحبها بجمالها ونيلها وهواها وأرضها
وموش بحبها بقساوتها من اللى حاكمينا
بحبها فعلا بحبها ....................
موش بحبها بظلمها من اللى حاكمينا
بحبها فعلا بحبها.....................
وموش بحبهابمشاكل الأكل والشرب والنظافة
بحبها فعلا بحبها ....................
وموش بحبهالمابتحملنى مالاأطيق من مصاريف
بحبها فعلا بحبها ....................
وموش بحبهاغربتنى 18 سنةولسةعايزةتغربنى
بحبها فعلا بحبها.....................
وموش بحبهالأنهابتهينى وتذلنى قدام العالم
بحبها فعلا بحبها....................
وموش بحبها عشان عايزة تغرب ولادى زيى
بحبها فعلا بحبها.....................
موش بحبهالأنى موش عارف آخد حقى قانونا
بحبها فعلا بحبها ....................
موش بحبهالأنى بنيت بيت لولادى بقيت متهم
بحبها فعلا بحبها ....................
موش بحبهالماأحتاج حاجة لازم أدفع رشوة
بحبها موش بحبها بحبها موش بحبها بحبها زهقت خلاص موش عارف أرس على بر

شهر زاد يقول...

محمد
انا اعترف لك اني غلطانة اني مقرتش البوستات دي قبل كده
دنت مصوراتي مش كاتب
دنت خليتني بقول
والله بحبك يا مصر
رغم اني مش مصريه
الام بتحن وتزعل
والاب بيغضب ويعطف
ودي حال البلد
مصر مش وحشه ولا نكرا ولادها
مصر ضحية ناس معرفوش مكانتها
مصرة بتتوجع وتتالم مع كل واحد واقف قدام النيل بيعيط علشان انقهر
مع اي شخص على الكبري فكر ينتحر من يأسو
انا بحب مصر
وبوستك زادني حبي في مصر
تحياتي

مدونة رحلة حياه يقول...

السلام عليكم
مصر بتحب كل اللى بيحبها وحتى اللى مش بيحبها بتقوله تعالى جرب عيش وسط ناسها واهلها اكيد هتدوب فى حبها
شكرا لكم تواجدكم