الأحد، 24 أبريل، 2011

تاج الثورة

نحن نحتاج الى ثورة فى المبادئ والمفاهيم والقيم والعادات والتقاليد نحتاج الى ثورة بداخلنا حتى تنجح ثورة شعوبنا 
بتلك الكلمات احببت ان ابدأ تاج الثورة والذى كلفت به من اختى الغالية رحاب صالح وصراحة لم اكن أبغى الكتابة فى هذا الموضوع لكثرة تناوله من اساتذة لى فشعرت أنى لن أضيف جديدا ولكن عندما كلفت به فلا استطيع التأخر فلذا تقبلوا منى ما سيأتى من كلمات علما بأنى أقبل اختلافكم معى فى الرأى وساتقبل كل تعليقاتكم سواء سلبا أو ايجابا فمنكم دوما اتعلم وهذا يسعدنى ......... مستعينا بالله ابدأ رسم التاج .

هل توقعت ثورة 25 يناير ...؟

لا متوقعتش الثورة واستطيع ان اجزم ان كل واحد شارك فى الثورة مكانش من

 طموحاته او توقعاته انها توصل للى وصلته ولكنها ارادة الله فكانت وعموما رفضى 

كان للمظاهرات لانى مش بقبلها لانها فى العادة مكانش بيخرج من وراها نتيجة

 كويسة ودايما بتكون عكسية .

هل كنت من ثوار ميدان؟ التحرير _ الكنبة _ الكمبيوتر _ حدد الميدان الآخر الخاص بك؟
لا انا مكنتش من ثوار الميدان وعموما الثورة مكانتش فى الميدان بس وانا كنت تقريبا بتابع الكل بالنهار وبالليل فى اللجان الشعبية زى اغلب المصريين وكان كل شعورى خوف على البلد وع الناس من كل حاجة داخلية او خارجية وبجد اللى بيحصل كان مهزلة ترويع وتدمير وحرائق وقتل وفتح سجون وانا مع الكل ان كتير منها كان مدبر لكن لما تلاقى ناس انت عارفهم ويلموا بعض ويروحوا يحرقوا قسم لمجرد ان مدن تانية اتحرق فيها قسم ويقولك نشارك فى الثورة زيهم واللى يموت ويصاب وهو بيدافع عن القسم اخواتنا واهلنا واصحابنا اعتقد ان التفكير بالشكل دا فى منتهى تدنى المستوى ومش عاوز اعبر عنها بلفظ تانى  وعشان كدا انا رفضت وهتلاقونى فى الوقت دا كتبت بوستات كتير تلاقوها كلها تحت عنوان معا من أجل مصر هنا وقلت انا مش مع او ضد بس انا مع مصر وصالحها ودا اهم عندى من اى حاجة تانية حتى انى قبل تنحى الرئيس كنت بجهز  بوست بعنوان رسالة الى الرئيس بطلب منه التنحى عشان مصر وكمان انا كنت عارف ان مفيش حلول دستورية غير انقلاب عسكرى او تسليم السلطة للمجلس العسكرى زى ما حصل كدا واتسألت من زميلة فى الموضوع دا ورديت عليه بكلامى دا.

 مالم تنجح الثورة في تحقيقه هو...... اختار شيئا واحدا؟

الثورة خلتنا نعرف ونتأكد اننا محتاجين ثورة من جوانا لأن بجد او ع الاقل دا اللى

 انا شايفه ان فى ناس كتير جدا استغلت أسوأ ما فى الثورة لتحقيق مصالح شخصية

 ودول ع فكرة مش ثورة مضادة ولا حاجة بس طبيعة استغلال مواقف وبصوا ع

 اسعار السلع وانتم تعرفوا كلامى عموما تلخيص كل كلامى فى اول سطرين فى 

البوست .

أكثر شىء فرحك في هذه الثورة هو...... اختار شيئا واحدا؟

أكثر شئ عجبنى فى الثورة هو اعادة احياء حب الوطن فى قلوب المصريين بعد ما

 كان عندنا شعور غريب اننا افتقدناه فعلا بس الحمد لله اللى حصل طمنا على بلادنا .

الشخصية التي اعجبتني خلال الثورة ...؟

الشخصية اللى اعجبت بيها فعلا كانت الجيش المصرى وموقفه ودا كان متوقع منه

 بس لازم نشكره على دا واللى يشوف اللى بيحصل فى البلاد المجاورة لينايحمد

 ربنا على نعمته علينا " 



الشخصية التي احتقرتها بسبب الثورة؟ 


مش هقول اسم حد بعينه بس أى حد استغل اللى بيحصل فى نصر شخصى او تحقيق

 مصالح واهواء مريضة بحتقره جدا لان مينفعش يكون اهلنا بيموتوا واحنا 

.................. بلاش دى عموما هو اى حد اساء استغلال الوقت .



أظرف شيء سمعته خلال الثورة ...نكتة ...تعليق ...حدث ...أخري؟



فى حاجات كتير بس منها حاجة ضحكتنى وبكتنى هو ان واحد صاحبى تقريبا


 خاصمنى وعمل مقاطعة معى عشان طلبت منه انه يهدى وميتصرفش بدون عقل او

 تسرع فكان رده انى مش بحب مصر ولا الثورة وقرر مقاطعتى وكان .



القناة التي تابعت من خلالها أحداث الثورة هي؟


أن تقريبا كنت بتابع كل القنوات العربية والمصرية عشان اعرف الصورة بكل

 الاشكال وكل اساليب العرض ومع اعتذارى فالجميع عنده اخطاء وانتماءات داخليا

 وخارجيا فامنيتى ان ارى الاعلام محايدا ينقل الصورة كما هى دون زيادة او نقصان .

الجريدة التي كنت تتابعها ።።።؟

انا عموما بتابع المصرى اليوم واليوم السابع والشروق وبسيط مقتطفات من جرائد

 اخرى "

الكاتب المفضل خلال الثورة هو؟

انا بحترم كل حد اتكلم بصدق وعشان صالح البلد بس عموما انا عندى اكتر من 

كاتب بس خلينا فى كوميديا ساخرة ويبقى الاستاذ جلال عامر 

المذيع (المذيعة) المفضل خلال الثورة هو؟


انا بردوا عموما بتابع منى الشاذلى بس دا طبعا لما يكون عندى وقت 


كلمة لشهداء الثورة ؟


أسأل الله ان يتقبلكم شهداء 


متقولش إية اديتنا مصر وقول هندي إية لمصر ؟ عندك حاجة تديها لمصر ؟



عندى اية اديه لمصر مش عارف عمرى اد اايه بس اتمنى ان يكون اعوام طالت او


 قصرت  اخليها كلها فى سبيل الله نصرة لمصر بكل الطرق والاساليب.

من سترشح لرئاسة الجمهورية ؟ ولماذا ؟

اللى هرشح لرئاسة الجمهورية ان شاء الله المرشح اللى هلاقيه مصرى بجد عشان مش

 هيبقى همه مصلحة البلد الا ابنها بجد فانا ساعتها ان شاء الله هصلى استخارة والا ربنا 

يختاره هيكون كدا طبعا بعد مراجعة تاريخ وخلفية وبرنامج كل المرشحين او ع الاقل

 اللى اقدر اتابعه واعتقد ان دى اقل حاجة نديها لمصر اننا نختار ابنها اللى يبنيها فعلا .

لو أصبحت رئيسا لمصر ما هي أول ثلاث قرارات لك؟
رغم انى مش بحب المناصب ولا الحاجات دية بس هو الحقيقة فى قرارات كتير بس بما انكم حجمتونى انا هختار ما يلى :- 
فى مجال التنمية العمل فورا على تنفيذ مشروع ممر التنمية (د فاروق الباز )
فى مجال التعليم العمل فورا على تنفيذ مشروع د زويل بمساعدة ذوى الكفاءة والاتقان والتميز فى هذا المجال وبما يتناسب مع شرائعنا وقيمنا ومبادئنا .
فى مجال الصحة العمل على اقامة مستشفيات ومراكز صحية بكل مكان فى ارض مصر بحيث يتواجد فى كل قرية على الاقل مركز صحى متكامل وعمل برنامج للتأمين الصحى الشامل المجانى لغير القادرين .
* لو أعطوك نصيبك من المليارات المسروقة , ما توقعك أن يكون نصيبك منها وماذا ستفعل بهذا المال؟

السؤال دا خايف ارد عليه بصراحة تفتكروا كلام وخلاص بس عموما هقوله واجرى على الله انا هتبرع باغلبه للأارامل وذوى الاحتياجات الخاصة واساهم فيه باى مشروعات يكون دخلها مخصص لفئات دى.


ابعت التاج ده لـــــ

انا مش بحب اطلب الكتابة من اى اخ او اخت بس اللى يحب يكتب التاج يعتبر واجب منى ليه 

30 رأيك يهمنى:

أم هريرة (lolocat) يقول...

السلام عليكم
ما يثير اعجابى دائما فيك اخى الفاضل هو تواضعك الدائم
وهذا التواضع كما قال المصطفى عليه السلام من تواضع لله رفعه فتواضعك يزيد من قدرك لدى كل اصدقاءك بارك الله فيك

الثورة خلتنا نعرف ونتأكد اننا محتاجين ثورة من جوانا

هذا ما انا متأكده منه تماما
كلنا نحتاج احلال وتجديد بنفوسنا لنعيد بناء مصرنا على اساس من التقدم والرقى

اجابات راقية كصاحبها
اشكرك اخى العزيز
جزاكم الله خيرا
لك ارق التحايا

المصوراتي يقول...

يا سلام عليكي يامصر

:)

اتفق معاك في كل ما قلت و بلو قرأت التاج الخاص بي لعرفت اننا متقاربان :)

جزاك الله خيرا اخي

سواح في ملك الله- يقول...

ردودك جميلة وصريحة
تحية لك اخي

norahaty يقول...

الردود صريحة وجميلة
ومتوافقة جدا معايا
بس حاختلف فى نقطة واحدة
التعليم:حأخليه نمرة واحد فى
المشروعات ومش معنى التعليم
المدارس فقط:لأ اقصد امحى
الجهل من بلدنا بقدر
المستطاع الجهل فى
رأيى المتواضع
هو عدونا
الأول

مصطفى سيف يقول...

كل يوم ارى فيك شيئا جديدا اخي العزيز
انك انسان رائع تحمل الكثير من المشاعر تحاول ان تخفيها لكنها لا تلبث ان تطفو على شخصيتك
انت انسان رائع وانا اسعد الناس لصداقتك
احييك اخي العزيز احسنت الاجابات كأي مواطن مصري يتمنى ابسط الاحلام والامنيات
تحياتي

لـــولا وزهـــراء يقول...

السلام عليكم ورحمة الله وبركاته

مبروك عليك التااااااااج
جميلة الاسئلة وجميلة الردود ونجحت في الامتحان (:

لولا

Casper يقول...

اجابات جميلة يا صديقي
وفعلا الثورة اعادت حب الوطن إلى القلوب مرة أخرى بعد عهد ظلم وفساد قد رحل

تقبل مروري
Casper

Carmen يقول...

كفاية انك بتقربنا لشخصيتك اكتر
اجابات دلت علي بساطة شخصيتك ورقيها
تقبل خالص احترامي

re7ab.sale7 يقول...

جميل يا استاذ محمد
بتثير اعجابي دوما
اجابتك بجد مش عارفةارد علي شيء منها دون الاخر
بجد اعجبتني جدا
بحسد نفسي بجد اني عرفتك

تخاريف مترجــِــمة يقول...

السلام عليكم يا محمد ،، عامل ايه ؟؟

ردودك راائعه ما شاء الله ،، بجد تشرفنا بآرائك المثمرة والعاقله جدا

اكتر حاجة ضايقتني هو صديقك اللي مشي ده وقال اعداء وكره وكلام غريب كده ،، انا اتضايقت ممكن لان صاحبتني برضه عملتها فيا وما زلنا على خصام للاسف :)

واكيد طبعا الثورة تمخضت في قلوبنا بحب مصر من جديد

انا اول مرة اشعر اني في بلدي

واول مرة برضه اقول مصر واحسها

شكرا يا محمد بجد على فكرك وتفكيرك

وربنا يحميك

تحياتي

فارسة بلا جواد يقول...

مسا الخير ودايما يارب الثورات عامرة فقط بالخير وللخير جاءت

وبصراحه //بأهنئكم ع الثورة وانكم قدرتم توصلوا رأيكم ع أرض الحدث

بس يمكن تقولولي شو دخلك انتي فلسطينه بس لاء مصر وطني التاني وعشت فيها فترة طفولتي ...وهي جزء من الوطن العربي
بس بصراحه شعب مصر ظلم الرئيس مبارك وهاد شي كتير مزعج ,,,
خدم مصر وراعاها حتى لو كان ظالم ما بتكون بهاي الطريقه

المهم بعد كدة بجد توضصلوا للي بدأتم الثورة من أجله
يارب أعزكم الله وهداكم ووفقكم ومصر غاليتي بألف خير

محمد الجرايحى يقول...

بارك الله فيك وأعزك

سندباد يقول...

اجابات رائعة ياصديقي جزاك الله خيرا وادعو الله ان يكون القادم افضل انشالله
تقديري واحترامي

كلمات من نور يقول...

سبحان الله

أعز تاج على قلبي هو تاج الثورة باسئلته وصورنا وتعليقاتنا الجميلة

أكيد مصر فخورة بأولادها اكيد

ساسو يقول...

اجاباتك اكتر من رائعه
بارك الله فيك

مدونة رحلة حياه يقول...

وعليكم السلام ام هريرة وجزاكى ربى خيرا على ما قلتيه فى حقى وليتنى استحقه

مدونة رحلة حياه يقول...

محمود ربنا يعزك ليا الشرف ان وافق كلامى ما طرحته رغم انى ما قرأت كلماتك ولكن الارواح جنود مجندة

مدونة رحلة حياه يقول...

سواح
متشكر ليك كتير ودوما اسعد عندما أقرأ كلماتك

مدونة رحلة حياه يقول...

نورهاتى
اشكرك على كلماتك وانا لم اقصد ترتيب القرارات ولكن توازى القرارات
دومتى بود

مدونة رحلة حياه يقول...

اخى مصطفى ربما يكون هناك من هو اسعد منك بتلك الصداقة وهو انا
دومت بود

مدونة رحلة حياه يقول...

لولا
ربنا يبارك فيك
وما توفيقى الا بالله

مدونة رحلة حياه يقول...

كاسبر نورتنى
اتمنى ان ارى كل منا يعشق تراب وطنه فهذا اقل القليل

مدونة رحلة حياه يقول...

كارمن
احمل لك الكثير من الشكر على كلماتك البسيطة التى تحمل بين طياتها الكثير
منك اقتبس الكلمات

مدونة رحلة حياه يقول...

استاذة رحاب
انا مكتبتش حاجة غير اللى عندى وكنت بتمنى تقبلوها وموافق على كل النقد
الحمد لله الذى وفقنى
واحسدنى على معرفتك ايضا وربما اكثر

مدونة رحلة حياه يقول...

تخاريف مترجمة
حمدالله ع سلامة حضرتك يا افندم
وشكرا على مرورك وتواجدك عندى

مدونة رحلة حياه يقول...

فارسة شو احوالك
كل العرب وطنهم واحد مهما اختلفت اقطارهم
دومتى بود

مدونة رحلة حياه يقول...

استاذى محمد الجرايحى
جزاك ربى خيرا على دوام دعمك لى

مدونة رحلة حياه يقول...

سندباد
ربنا يبارك لك ويتقبل منا دعواتنا

مدونة رحلة حياه يقول...

كلمات من نور
فعلا هو اعز تاج علينا ولنا وليتنى نتم خطاه

مدونة رحلة حياه يقول...

ساسو
نورتينى يا افندم ومتشكر كتيررررررررررررررررر