الجمعة، 10 فبراير 2012

مغلق للاضراب

النهاردة قمت من النوم فى معادى كالعادة  ( الحمد لله الذى أحيانا بعد ما أماتنا واليه النشور )
حاولت انور الاباجورة لاقيت الكهرباء مقطوعة قلت خير الحمد لله هقوم اتوضى عشان الحق صلاة الصبح بفتح الحنفية مفيش مايه لا حول ولا قوة الا بالله حاولت تانى وتالت وافتح المحابس واقفل المحابس ولا حياة لمن تنادى طيب الحل أيه اتيمم طب مش التيمم له شروط طب هعمل ايه يعنى ؟
لاقيت ازازة مايه موجودة اتوضيت بيها وصليت الحمد لله  وقعدت شوية قلت الاذكار وقرأت ما تيسر من كتاب الله وقلت اشوف اى حاجة افطر بيها عشان انزل اروح المكتب وطبعا لقيت الثلاجة فاضية (الحمد لله على كل حال ) طيب مش مشكلة اشرب اى حاجة دافية وانزل بشغل البوتجاز لاقيت الغاز مقطوع هو كمان قلت ( لعله خير )
لبست هدومى ونزلت قلت اشترى اى حاجة وانا رايح المكتب افطر بيها واتمشيت فى الشارع ومش لاقى حد مقابلنى استغربت الوضع الغريب اللى بيحصل لا محلات فاتحة ولا ناس ماشية وحتى الكهرباء والمياه والغاز مقطوعين
قابلنى (سائل حاجة ) لله يا بيه ، انتهزتها انا فرصة وقلت هعرف من الرجل دا ايه اللى بيحصل قلت له بقولك ايه يا حج هى البلد فاضية ليه ، هو انت مش عايش هنا ولا ايه يا بيه ؟ ليه يا حج ؟ امال ازاى متعرفش اللى بيحصل فى البلد ؟ عادى يا حج مش بتابع بس مش اكتر ، عموما يا بيه هكسب فيك ثواب واقولك بيقولوا عاملين اضراب يا افندى ؛ اضراب اه امال انت مش عامل اضراب ليه يا حج ؟ يا بيه انا لو عملت اضراب مش هلاقى أكل أنا كدا كدا من غير اضراب مش لاقى ما بالك بقى لو عملت اضراب تفتكر الناس هتيجى لحد عندى تدينى وهيدونى منين وهما قاعدين من غير لا شغلة ولا مشغلة .
كملت طريقى للمكتب بعد ان فقدت الامل فى ايجاد اى وسيلة مواصلات او اى محل او مطعم او بائع متجول اشترى منه اى لقمة ابدل ريقى بيها .
وصلت مكان لمكتب ولقتنى طبعا لوحدى والمكاتب اللى حواليا قافلين ولقيت على بعضها يافطة مكتوب عليها ( مغلق للاضراب ) قلت دا الموضوع بجد بقى يالا خلى الواحد يشتغل بروقان من غير صداع طول النهار .
بسم الله 
فتحت المكتب وقلت اقعد اشوف شغلى وربنا كريم الحمد لله ان الازازة فيها مايه من يومين الواحد يبله ريقه بيهم لحد ما ربنا يفرجها من عنده .
بدأت اشتغل وقلت اتصل بالناس عشان المواعيد اللى عندى رفعت السماعة الحرارة مقطوعة ( الله دا المصرية للاتصالات مشاركة فى الاضراب ) طيب اجرب الموبايل لاقيت الخدمة معطلة قلت تمام كدا هى صفصفت عليا لوحدى .
عدى شوية وقت لقيت مراتى جاية المكتب تجرى ونفسها مقطوع فى ايه يا بنتى خير اللهم اجعله خير الواد تعبان وجسمه ساخن وعمال يرجع طيب مروحتيش بيه المستشفى اللى قريبة من البيت ليه رحت ولقيتهم قافلين طب والدكتور رحت العيادة لقيتها قافلة طيب مشوفتيش اى صيدلية جيبتى له مسكن منها عديت على كام صيدلية وكلهم قافلين طيب ( قدر الله وماشاء فعل ) بصى فى شوية مايه فى الازازة اعملى له بيهم كمدات لحد ما ربنا يفرجها .
احنا مش لو كنا فى البلد دلوقتى كنا لقينا عندنا عيش من اللى امى بتخبزه وهنلاقى مايه متخزنة فى الزير وحتى لو مفيش هنلاقى طلمبة نجيب منها مايه وهنلاقى خضار فى الارض ناكل منها وحطب وخشب نسوى بيه الاكل ونعمل عليه شاى كمان .
عادى لما كل وسائل الاتصالات تتوقف  ( انترنت - تليفونات - بريد .............. )
عادى لما كل وسائل المواصلات تتوقف  ( طائرات - سفن - قطارات - سيارات - توك توك ............ )
عادى لما كل وسائل الاعلام تتوقف - عادى لما المستشفيات تتوقف - عادى لما الجامعات تتوقف - عادى لما المرافق ( كهرباء - غاز - صرف - نظافة ) تفصل وتعطل 
من حق الناس اللى فيها انهم يشاركوا هما كمان 
الحرية سقفها ( انت  ) متعديش لحد غيرك
( من حقك تعمل اللى انت عاوزه بس كون متأكد ان قرارك او تصرفك مش هيعود بالضرر على غيرك ( لا ضرر ولا ضرار )
أنا مش هشارك فى الاضراب 
ببساطة دا كان رأيى وطبعا من حقك توافق او ترفض دا شئ يرجعلك 
الصورة مهداه من ( ام هريرة )

18 رأيك يهمنى:

أحمد الصعيدي يقول...

وصفت الحال بالظبط يا محمد ربنا يعزك

ويبارك فيك صح الكلام جدا

أحمد الصعيدي يقول...

وربنا يصلح الحال

Nour Sherif Mohammad يقول...

حضرتك جبت مـ الآخر :)
وأنا موافق جدا على كلامك :)

أم هريرة.. lolocat يقول...

السلام عليكم

الاضراب درب من الفشل والفساد انا ضد الاضراب طبعا
ربنا ما امرنا ان نحل فساد بفساد ان الله تعالى قال
وقل اعملوا فسيرى الله عملكم ورسوله والمؤمنون
مقالش ابدا نترك عملنا وننساق وراء كل ناعق

مصر بلدنا محتاجة كل ايد تبنى ومش تهد كفااااااااااية خراب


ثورة وقمنا بها الحمد لله وكل اللى بيحصل ماهو الا رد فعل طبيعى بعد اى ثورة ومافيش داعى بقى نهدم اللى قمنا به ابدا

ان شاء الله ربنا هيسلم يامحمد ماتخفش على مصر لسه فيها رجال بتخاف عليها

تحياتى وتقديرى لك

مونتي بوكيه ورد يقول...

صديقي
جميل تصورك وتوقعك و رؤيتك الجميله و هو دا ال كان نفسي أقوله و تصور علي لسان انسانه غاليه أقوله ان فعلا هو دا الطرف الثالث هو دا الطرف الخفي ال مازال بيلعب بعقول الكثير من اجل الايقفاع ببلدنا انا هروح الشغل يوم السبت ان شاء الله و هروح امتجحاني في الجامعه ومش هعطل الشغل ولا هقطع واجبي علي بلدي واهلي و ناسي و ان كان في مبادره للخير عاوزين يعملوها يذهبوا للصلاه بقلب رجل واحد علي يقين ويدعوا ربنا كصلاة الاستسقاء
يشتغلوا و يدوروا و يقولوا لا لكن من غير ما يسمحوا لحد ياكل الثوره علي حسهم
تسلم صديقي

BNT ELISLAM يقول...

معاك حق يابو معاذا انا كمان مش هشارك فى الاضراب وتحياتى لك ولفكرك

هبة فاروق يقول...

انا معاك فى كل اللى قولته الاضراب ضرر لكل الناس ولكن ما سمعته فى احدى القنوات ان الاضراب سيأتى تدريجيا وسيبدا بالتعليم العالى يليه اجهاز المصرفى الاان يصل لاضراب المواصلات حتى تتم المطالب وتنفذ
بجد انت شرحت الحاله اللى ممكن نوصلها لو كل شىء فى مصر توقف
ربنا يعدى ايامنا على خير
تحياتى

eng_semsem يقول...

صديقي العزيز لقد ذهبت بخيالك بعيدا جدا
فهذا لن يحدث في مصر
هناك الكثير دائما ما يصف الشعب بالتبعيه والجهل ولكن عندما يصتطدم الواقع بالكلام تجد شعب واعي يفهم ويقدر اختياراته
في ناس هتشارك في الاضراب لان يوم السبت اجازه عندهم اما اللي هيشاركوا لانهم عايزين اضراب فعلا نسبه لن تتعدى 2% من شعب مصر
ربنا يهدينا للي فيه الخير ويصلح الاحوال

faroukfahmy58 يقول...

وصفت الحال بالالم الموجود فى نفوسنا باصدق تعبير يا مجمد
المفروض هذه الايام نحتفل بيها ولا نعتصم فيها فحزننا سيفرح فيه العزال اللى فى طره
هذه ايام اعياد وليست ايام افساد

سواح في ملك اللــــــــــــــــــه- يقول...

والله يامحمد ياخويا

العالم دي باين عليها عالم مغيبة

او عالم بتستعبط بجد

اضراب ايه بس الله ينتقم منهم

ده البلد موقوف حالها بقالها سنة

ناقصة اضراب

ومين اصلا اللي هيسمعلهم

دي عالم فاضية مش لاقيين حاجة يعملوها غير التخريب

تحيتي

أم هريرة.. lolocat يقول...

السلام عليكم اخى محمد
للعلم فقط الصورة ليست من تصميمى لكن وجدتها على جوجل بلس ورأيت ان من واجبى نشرها على كل الاصدقاء :)

Noha Saleh يقول...

رائع بجد
انا كمان ضد الاضراب

لـــولا وزهـــراء يقول...

ربنا يكتب الخير لمصر

لولا

norahaty يقول...

يسلم عقلك
قرارك يااستاذ
محمد ياأبو معاذ

norahaty يقول...

السؤال هوطب الدول
اللى استخدمت العصيان دا
للضغط على مستعمر او على
حاكم ظالم دبروا حياتهم
ازاى؟افيدونى افادكم الله.

عبير علاو يقول...

لا حول و لا قوة إلا بالله

مدونة رحلة حياه يقول...

السلام عليكم
بشكر كل حضراتكم ولعل فى القادم خير ان شاء الله

zizi يقول...

الله ينور يا محمد ..فعلاً الإضراب خراب من كل ناحية وربنا يهدي الأحوال يابني مصر ماتستاهلش كده أبداً..تحياتي