الأربعاء، 21 مارس 2012

صحى النوم يا ثورة


لما تلاقى الاهمال والتسيب واللامبالاة بقى شئ طبيعى وان الموظف مثلا يروح الشغل ان راح متأخر ولما تقوله يا استاذ خلصلى شغلى بعد اذنك انا منتظرك بقالى فترة يقولك يا اخى هى الدنيا طارت مستعجلين على ايه انتم متعرفوش ان لبلد حصل فيها ثورة واتغيرنا يعنى هو دا التغير من وجهة نظر حضرتك يبقى صحى النوم يا ثورة .
لما تلاقى مثلا التعيينات فى الجامعات بمواصفات معينة وبشروط معينة ولازم تكون حاصل على شهادات معينة بلرغم من عدم علاقة الشهادة دى بالتخصص وبالرغم كمان من انك حاصل على تقدير اعلى من كل المتقدمين فى التخصص المطلوب وفى الاخر يقولك كل دا مالوش لازمة لازمة الشهادة دى ومعتمدة من جهة معينة يبقى صحى النوم يا ثورة .

لما تلاقى المناهج الدراسية فى التعليم الاساسى وكمان الازهرى بيتم تدريس جزء منها والأكثر يتم تجاوزه بحجة ضيق الوقت وكثرة المنهج طيب لما انتم عارفين ان المناهج كبيرة معملتوش حسابكم ليه ذنبهم ايه الاطفال يتعلموا بدون تعليم ويبقى كأنك يا ابوزيد ما غزيت ويقولك احنا بنفذ المطلوب يا استاذ يبقى صحى النوم يا ثورة
لما تلاقى حبايبنا الاطباء يستلموا التعبان مننا ينقلوه لبعض تروح للدكتور كذا يعمل لك كذا ومعمل كذا يعمل لك كذا لحد ما يبيعوك اللى قدامك واللى وراك وبعدين ربنا يكرمك بطبيب معندوش ضمير على حسب توصيفهم ويقولك يا عم حج انت ليه عملت دا كله انت بخير ومعندمش اى حاجة من اللى بتقول عليها وتلاقى نفسك خفيت وبقيت تمام يبقى صحى النوم يا ثورة .
لما تروح تخلص شغلانة ف جهاز ادارى معين وتلاقى الموظفين عاملين اضراب وواقفين عمالين يهتفوا وتسال اللى موجودين منهم على مكاتبهم على شغلك يقولك انت مش شايف اننا عاملين اضراب يبقى هنشتغل ازاى طيب وهتخلصوا الاضراب امتى قول يارب يا ابنى يارب مالناش غيرك وسبحان الله رغم ان اغلب المعتصمين والمضربين عارفين انهم لو اتحاسبو هيتسجنوا بس اهى نفس بقى لساكم بردوا نايمين صحى النوم يا ثورة ..
لما تلاقى الكل بيتسابق عشان  يترشح لكرسى الرئاسة وكانها وسية والكل عاوز يبقى خولى عليها بغض النظر عن انه مؤهل او لا يستحق او لا يبقى صحى النوم يا ثورة .
لما تلاقى بيوت كتير مبقتش لاقية رغيف العيش ولا انبوبة الغاز ولا ثمن الدوا  والاسعار طالعة نار ورغم كدا تعدى على اى محل لتجارة المحمول تلاقيهم عليه طوابير يبقى صحى النوم يا ثورة
لما تبقى الناس كلها فى وادى والاخوة الاعلاميين فى وادى تانى يخدوا الناس للناحية دى شوية ولفلان شوية وعلان شوية وحقيقة يزيفوها وكدبة يصدقوها  وتفاهه يسوقوها وقيم ومبادئ يدمروها ودماء ناس يتاجروا بيها لأ وماشاء الله عليهم دموعهم قريبة ياه لساكم نايمين يبقى صحى النوم يا ثورة .
زمان قلت اننا محتاجين ثورة اخلاق ثورة قيم  ثورة معتقدات ثورة بجد مش كلام ، الثورة ابدا مش هتحقق اهدافها على الارض الواقع الا لما تتحقق جوانا الا لما نتغير من جوانا بجد الا لما نبقى مؤهلين اننا نبقى بالشكل اللى عاوزين بلدنا تبقى عليه ومتنسوش ( إن الله لا يغير ما بقوم حتى يغيروا ما بأنفسهم )
كفاية كدا كلام وصحى النوم يا ثورة

9 رأيك يهمنى:

Noha Saleh يقول...

فى حاجة غلط
المشكلةمش مشكلة كراسى ناس فاسدين ماسكينها


المشكلة مشكلةالشعب

لازم الناس تتغير

ليلى الصباحى.. lolocat يقول...

الى اليوم لا ارى اى تغيير فى البلد سوى ان الشباب قل عددهم بسبب استشهادهم وقت الثورة


وهذا ليس يِأس او قنوط لكن تمنى ان نرى مصر فعلا افضل واجمل


صدقت اخى فى كل ما تفضلت وقلته
للاسف هى صور مرفوضة لا زالت تحدث كل يوم نتمنى ان تزول ويحل محلها الاخلاص والصدق فى العمل لنرقى ببلادنا حقا قولا وفعلا


جزاك الله خيرا وبارك فيك

سواح في ملك اللــــــــــــــــــه- يقول...

كثيرا هم من فهموا الثورة

علي انها تمرد

وهناك فرق شاسع بين الاثنين

Unknown يقول...

قلبت علينا المواجع

غير معرف يقول...

مساء الورد

حتى تعطي الثورة ثمارها نحتاج لحملة توعيه كبير جداً لإن المشكلة ليست مشكلة رئيس وخلع فالمجتمع برمته يجب أن يتغير ويتم القضاء على الفساد في كل الطبقات ونشر القيم والمبادئ السليمة التي سترقى بالدولة ككل وهذا يحتاج لوقت طويل جداً فلا تيأس فبإذن الله ستتغير الأوضاع للأفضل مع قليل من العمل والصبر .

تحياتي وإحترامي

eng_semsem يقول...

جزء كل واحد فينا محتاج لتغيير بس المشكله ان كتير بيدور على غلطات غيره ومش بيحاول يشوف غلطاته عشان كده كله بينتقد كله ومفيش واحد عارفين نقول عليه كويس
تحياتي

faroukfahmy يقول...

كلامك يامحمد يتطبق تماما على الواقع المصرى وكأنما نفهم فى كل شئ ولا ينقصنا شئ من مرآى ومسمع وللاسف ليس هناك ترجمه عمليه لما نراه ونسممعه كله كلام فى كلام
سبعنا كلام نفسنا يقى ناكل اعمال
مقال له مغزى عميق ومكتوب بعناية فائقه

نيللي علي يقول...

احنا باختصار في مولد وصحبه غايب..ربنا يحفظنا ونمر من الازمة علي خير

Imane Belâbbes يقول...

لهذه الأسباب كانوا قديما يقومون بما يسمى ثورات مجهز لها ، بعد أن يبنوها بتوعية الناس من الداخل أولا حتى يكونوا قد فهموا أن هناك فرق بين ثورة لمجرد الثورة و ثورة التغيير و ثورة التغيير ليست مجرد فوضى بل تغيير الفوضى المنظمة

أعجبتني مدونتك