السبت، 4 أغسطس 2012

فرصة متفوتهاش ( تجمع أبوالريش )



القلوب دايما بتبقى فيها شوية قسوة بتبقى محتاجة شوية تعب عشان ترق وتخضع لشرع الله والنفس دايما معاندة الا ما رحم الله بتبقى محتاجة جهاد كتير قوى عشان تمشى فى اتجاه الخير ، فى حاجات كتير قوى بتساعدك وتقويك على نفسك وتخليك توصل بقلبك لدرجة شديدة من الرقه.                                                       
منها زيارة المرضى والوقوف بجانبهم والأخذ على ايديهم وتقديم المساعدات لهم حتى لو كانت معنوية  ،  مجرد تواجدك بيفرق كتير مع الانسان اللى ربنا ابتلاه بمرض لانه بيكون فى لحظة من أشد لحظات الضعف والوحدة وبيبقى من جواه موجوع قوى وتعبان وبيخفف عليه دا وكمان بيساعد فى علاجه انه يلاقى حد جنبه يمسح على راسه ويطبطب عليه ويخفف من وجعه واللى بيحس بيه صدقنى مجرد ابتسامتك حتى هتفرق كتير .                                                          
كتير قوى من اهالينا مش بيملكوا تمن الدوا ولا العلاج وكتير قوى من مستشفياتنا مفيش فيها الأجهزة ولا حتى العلاج الكافى عشان توفر خدمة صحية وطبية معقولة لأهلنا من المرضى ( عافى الله الجميع ) .                                                
مستشفى أبوالريش لعلاج الاطفال من المستشفيات المتجاهلة اعلاميا رغم الخدمات المتميزة اللى بتقدمها عشان كدا كانت الدعوة دى( دعوة تجمع خيرى فى مدخل المستشفى اليابانى للاطفال بابوالريش يوم السبت 11 اغسطس الساعة 4 عصرا ) والتفاصيل هتلاقوها هنا 
بنت خيخة  و فاتيما وقوس قزح وأبوالريش                                                                    
حاول تحضر وحاولى تحضرى وساهموا بكل اللى تقدروا عليه فرصة احنا فى رمضان والاجور مضاعفة وكمان ربنا وعد على لسان نبيه ( ما نقصت صدقة من مال ) وكمان ( الصدقة تطفئ غضب الرب ) لا وكمان ( طهرة للصائم )من اللى ممكن يكون بدر منه ... مهما كان اللى هتساهم بيه بسيط صدقنى مع غيرك هيفرق كتير ... دى فرصة متفوتهاش .  
                                                                    

8 رأيك يهمنى:

لــــ زهــــــراء ــــولا يقول...

ربنا يجازيك كل خير يا محمد ويبعد عنك المرض ويشفي كل مريض ويخفف ألم كل تعبان ومهموم .. الابتسامة اقل شئ بتسعد قلب الانسان مش محتاجة مجهود مجرد مط الفم بتاخد عليه صدقة
والمسح على شعر اليتيم يرقق القلب ايضاً
اسفة على قلة المتابعة وهذا تقصير مني ارجوك سامحني
لولا

faroukfahmy يقول...

بارك الله فيك مساعيك وسعيك للاقدام على الخير وخاصة فى مشوار الصدقة الجارية

زينة زيدان يقول...

بارك الله فيكم على هذه الجهود الطيبة

و جعل الله ذلك في ميزان حسناتكم

فاتيما يقول...

كتر الف خيرك يا محمد
وربنا يقعدهولك ف معاذ يا رب
وتشوفه احسن الناس

:)

كريمة سندي يقول...

تجمع وصدقة مقبولة .. بارك الله في جهودكم وجعله الله في ميزان حسناتكم آمين

داليا ..قوس قزح يقول...

جزاك الله كل خير على التنويه .. الدال على الخير كفاعله

مدونة رحلة حياه يقول...

السلام عليكم
متشكرونيش على حاجة مليش يد فيها اشكروا اصحاب الدعوة وربنا يجازيهم خير
ويارب نقدر نقدم كلنا اللى يكون سبب فى تغيير بلدنا للافضل

Unknown يقول...

فين زياره السنه دى يا شباب
أبو الريش بتستناكو
www.abuelrishfriends.com
https://www.facebook.com/abuelrishfriends
https://www.facebook.com/A.F.N.G.O
https://twitter.com/AbuElRishFriend
جمعيه أصدقاء مستشفيات أبوالريش للأطفال
لمستقبل أطفالنا