الجمعة، 17 ديسمبر، 2010

كلام له معنى

السلام عليكم ورحمة الله وبركاته 
بسم الله توكلت على الله ولا حول ولا قوة الا بالله 
ماهو الواحد قبل ما يدخل مشكلة عويصة زى اللى احنا فيها ويفتح بإيده عش الدبابير لازم يسخن ويا سلام بقا لو شوية نسكافيه ويلملم اوراقه اللى مفروده قدامه ويشوف هيبدأ بأيه ...................... على كل حال انا قصدى شريف وربنا يستر بقا 
الشكر الخالص لكل اللى علقوا واللى قرأوا الموضوع واللى افادونى بأرائهم واللى استنوا منى الرد  واللى بشكرهم تانى وتالت على دعمهم ومشاركتهم ليا فلهم جزيل الشكر 
طبعا كان الظاهر من كل التعليقات الرفض للاجبار فى المشروع وخاصة الاجبار من الزواج الثانى او الثالث او الرابع وفضلتوا انه يكون مساعدة غير المتزوجين على الزواج بدل من التعدد 
بداية بس بحب اوضح انى عرضى للمشروع على حضاراتكم مش معناه انى موافق عليه بس انا حبيت اعمل نوع من الاثارة الفكرية والحوارية لما الاستاذ فاروق عرض المشروع وحبيت اعرف تعليقاتكم وردودكم وتفكيركم هيوصلنا لايه عسى اننا نلاقى حل يفيد الجميع .
الحقيقة ان اغلب الردود كانت مركزة على الاسباب اللى ادت للموضوع نفسه وطلبت حلها زى الابتعاد عن الدين وزى البطالة وزى المغالاة فى المهور وزى ارتفاع اسعار الشقق السكنية وزى ارتفاع التكاليف وزى توزيع الثروات وزى  الاختلاط ومساوئه واضراره واللى عجبنى اكتر اشارة بعض من حضاراتكم على فكرة البطالة الاختيارية ( سواح فى ملك الله - د / ولاء )والبعض قال ان المشروع غير منصف وهتكون اضراره اكتر من منافعه و(ام هريرة ) مشكورة ذكرة مشكلة الكنيسة المصرية مع التعدد كمثال . فى ناس تانية قالوا مفيش مشاكل من التعدد لأن دا شرع الله (كلمات من نور ) ذكرت مشكورة قصة متعلقة بتعدد الزوجات ووضعت رابط لها فى التعليقات وكانت قصة هادفة جدا وواقعية وكمان وضعت رابط لدروس الشيخ وجدى غنيم وذكره لرأى الاسلام فى التعدد ولماذا شرعه الله .
الاخت ( ستيتة حسب الله الحمش ) قالت ان المشروع لطيف بس انا محتاج اصحح المعلومات لان اخر تقرير للجهاز المركزى بيقول ان عدد الذكور فى مصر يفوق عدد الاناث بقليل واننا لما نعدد الزوجات باقى الشباب هيتجوزوا مين وبالتالى هينتشر التحرش والاغتصاب وبقولها حضرتك معاك حق ان اخر تقرير فعلا مذكور فيه اللى حضرتك ذكرتيه بس انا مقلتش ان فى مصر عدد الاناث اكتر ولكن قلت فى مصر 9 مليون عانس (غير متزوجات ) بناء على طلب د/ ولاء  وعموما نسبة الذين لم يتزوجوا فى مصر من الذكور حسب اخر تقرير منشور للجهاز المركزى 33.6% ومن الاناث 24.3% وعدد الذكور فى سن 25 سنة 3مليون و330 الف والاناث 3مليون و414 الف وفى سن 35 سنة من الذكور 2مليون و438 الف والاناث 2مليون و475 الف ونسبة الذكور الارامل والمطلقين 2.2% ومن الاناث 11.9% فى المدن 20.6% وفى الريف 8.97% ومتوسط سن الزواج عند الرجال 29 سنة والاناث 23 سنة والطلاق 37 للرجال و31 للاناث تفتكروا دول يروحوا فين .
غيرهم قال اننا لازم نبحث عن مجتمع يعرف الحقوق والواجبات ويصنع الخير للحياه من أجل الله .

وأقول :-
بداية بشكر الاستاذ فاروق على تفكيره ومحاولته حل المشكلة ويكفيه انه فكر وحاول وبوضح ان اللى دفعه لعرض الفكره ما تم ذكره من عدد العوانس فى مصر ونسبة العزوف عن الزواج سواء فى لبنان او العرق او غيرهم ........
ثم ارسل تعليقا قال فيه ما يلى 
إخوتى وأخواتى ............
فهمتونى غلط أحب أن أصحح شيئا
أولا : عمرى 64 عاما موش شاب عندى ولدين عايزين يجوزوا ( مهندس ودكتور )
ثانيا: لم أقصد مافهمتموه أن الجواز إجبارى من الدولة للقادر أو أن يزوج ثلاثة شباب بعد أن يتزوج هو أو يزوج أربعة إذا لم يرد الزواج أصلا وهو قادر
ثالثا: أن يكون الزواج إجبارى له إذا رفض أن يساعد ثلاثة أو أربعة شباب الزواج ويكون الإجبار ليس بإختيار الحكومة بمعنى أن يختار هو زوجات وهى توافق عليه وعلى التعدد وتكون راضية تماما بالزواج والتعدد وإلا إذا رفض ذلك ولم يكن ليه قدرهة على ذلك ( ليس ماديا) بل نفسيا وجسمانيا وصحة فعليه إذن أن يدفع لثلاثة شباب ( إذا كان متزوجا بواحدة)أو أربعة(إذا كان لايريد الزواج حتى من واحده)ففى هذه الحالة يقوم بتزويجهم .
لماذا نحن مندفعين بالرد دون تأنى ودون تفهم للموضوع دايما مندفعين
رابعا : لاأنا ولاأحد من أسرتى جميعا تزوج بأكثر من واحدة حتى الآن .
فكروا جيدا فيما قلت وجابوا لايوجد إلزام على أحد ( قل موافق على الحل الأول أو الثانى كما قالت كارولين فاروق )أو أرفض الإثنين وتضع من عندك حل ثالث كونوا عمليين وحلوا المشكلة بلاش نقف نتفرج كده .
ولاداعى للبحث عن سبب المشكلة فهذا تضييع للوقت موش عايزين تحلوا حاجة أبدا شكرا لكم ( إقتراح فقط)

لا اجبار فى الزواج لأى من الطرفين فمن شروط صحة الزواج التراضى وهو يعنى الايجاب والقبول من الطرفين حتى ان النبى قال (لا تنكح الأيم حتى تستأمر ولا البكر حتى تستأذن قالوا يا رسول الله وكيف إذنها قال أن تسكت ) وقال (الثيب أحق بنفسها من وليها ) رواه الجماعه الا البخارى ........ فلا اجبار عندنا فى الزواج والا كان ما ذكرناه فى الموضوع نفسه ( فى حاجة غلط ) يخالف هذا لاننا ذكرنا من الاسباب الاجبار على الزواج من احد بعينه ....... كذلك لا يجوز اجبار احد على فعل خير وانما يمكن حثه على ذلك بدعمه من الدوله او تخفيف الاعباء الضريبيه عنه وغيرها كثير...
أما عن تعدد الزوجات فان الاسلام لم يأتى به ولكن جاء الاسلام والتعدد منتشر فى الجزيرة العربية حتى ان الرجل كان يتزوج اكثر من 10 زوجات وقيد الاسلام التعدد وحدده ووضع له شروطا فلا يجوز للرجل أن يجمع أكثر من 4 زوجات ولا يجوز له أن يعدد الا اذا كان لديه القدرة والاستطاعة ( ماليه - صحيه - نفسيه ) واشترط للتعدد العدل والا يحرم على الرجل التعدد اذا فقد شروط ذلك وعندما شرع الله التعدد للذكر فلعلمه بخلقه وما يصلحهم ونخشى على من يرفض شرع الله أن يحبط الله عمله  ذلك بأن الله قال (ذلك بأنهم كرهوا ما أنزل الله فأحبط أعمالهم ) 
اذا تزوج رجل من امرأة وكانت مريضة او لا تنجب او كان لا يتحمل شهوته فى وقت عذرها الشرعى فماذا يفعل ألا يحق له ان يطبق شرع الله طالما ملك الاستطاعة اما اذا افتقد الرجل القدرة فلا يجوز له التعدد ولا حتى الزواج من واحدة ان فقد القدرة الجسدية واذا كان بالرجل مرض او عدم القدرة على الانجاب فلزوجته الحق فى ان تطلق اذا ارادت ذلك . نبى الله داود كان له من الزوجات مائه ونبى الله سليمان كان له من الزوجات ألف ونبى الله يوسف واسماعيل وابراهيم عليهم السلام  تزوجوا  بأكثر من واحدة وغيرهم وانما ذلك مثالا ..
فى ا لكويت فى فترة من الفترات انتشرت ظاهرة ارسال الخطابات من الفتايات الى النساء المتزوجات يطلبن منهن السماح لأزواجهن بتعدد الزوجات رأفة بهن وحفظا لهن من الفتن وتحقيقا لرغباتهن وفى بعض الدول الاجنبية اقروا فى بعض المؤتمرات الدولية تعدد الزجات على انها من توصيات المؤتمر لحل مشاكلهن وغيرهم كثير .....
والرابط دا هتلاقوا عليه ردود كتير لكلماتكم واسئلتكم 
http://www.islamway.com/?iw_s=Article&iw_a=view&article_id=218
عموما انا مش بدافع عن تعدد الزوجات فشرع الله لا يحتاج الى دفاع منا 
انا عموما بقول ان العنوسة (تأخر سن الزواج ) ما هى الا نتيجة لكتير من المشاكل التى كنا نحن سببا لها واللى ذكرناها قبل كدا واللى موجود غيرها كتير ( ظهر الفساد فى البر وابحر بما كسبت أيدى الناس ليذيقهم بعض الذى عملوا لعلهم يرجعون )
الحل زى ما حضرتكم تكرمتم وذكرتم يبدأ بالعودة الى شرع الله ودا هيحتاج دور كبير جدا سواء كان اعلامى او تعليمى او تثقيفى ونفسى لمحاولة معالجة العزوف وكمان تربوى عشان نحاول نغير المفهوم الزواج تانى عند الناس والمجتمعات فى دور كبير للأسر فى دور كبير لرجال الاعمال فى دور أكبر لعلماء الامه وحكامها  المشكلة عاوزة تكاتف من الكل عشان تتحل ( ايد لوحدها متسقفش ) 
احنا بس حبينا ناخد خطوة على الطريق يمكن نقدر نوصل لحل او على الاقل نفكر الناس تانى بالمشكلة اللى عايشة فى بلادنا وبتهد فيها .
فى النهاية بشكر حضاراتكم كلكم على مشاركتكم ودعمكم وكمان وقتكم وانتظروا منى الجديد ................ اسأل الله التوفيق 
انا كنت ناوى انزل الموضوع فى اكتر من بوست عشان مطولش عليكم  وفعلا عملت كدا بس خفت تقتلونى عشان كدا غيرت ونزلته على بوست واحد يارب يكون غطى جوانب المشكلة . مستنى تعليقاتكم 

29 رأيك يهمنى:

Dr/ walaa salah يقول...

مشكور اولا لإهتمامك بالموضوع

بس انا بس كنت عايزه اشير لنقطه

بلاش لفظ عانس دي

انا برفض اللقب ده مهما سني كبر

محدش في ايده شئ عشان يجوز او يطلق نفسه


خليها احسن اللي مش متجوزين


بلاش عانس وخلينا نرفع الشعار ده بلاش عااااااااااااااااااااااااااااانس

شهر زاد يقول...

موضوع قيم
بس حييجي وقت الي النسوان هي الي تدعي لتعدد اليجات
وابقي افتكريني
تحياتي

karmen يقول...

بصراحة كان نفسي اشارك معاكم من بدري بس للاسف جيت متأخرة
اطلعت سريعا علي الفكرة بجد تسلم ايدك واتمني تتقبلني من متابعينك
تحياتي العطرة

ستيتة حسب الله الحمش يقول...

عارف فيه حل بسيط قوي التأثير جدا
بس محتاج دعم من الشيوخ الثقات
اللي الناس بتسمع كلامهم اكتر من اي حكومة
فنحن شعوب دينية بالسليقة

الحل ببساطة اللي حج واعتمر مرة واحدة ثم رغب في تعدد العمرات
الشيوخ يحثوه حثا حثيثا :) ان الكام ألف اللي ها يعتمر بيهم تاني او ها يحج يوم ما يفتح بيهم بيت مسلم تخرج منه ذرية موحدة افضل
عارف في سنتين بس من انطلاق مشروع زي ده ها يحصل ايه في بلدنا؟
سنتين اتنين ممكن يحلوا جزء كبير جدا من المشكلة

لكن احنا معندناش ثقة في حكومة نسلمها فلوس تتحول سويسرا
ومعندناش ثقة في كثير من رجال الدين ودي حقيقة دون الدخول في تفاصيل او جدال
وشايفين ان المهم ألحق اروح كل سنة اغسل ذنوبي مع ان زواج العاني والله ها تغسل ذنوب ان شاء الله وتزيد حسنات وكل يوم البيت ده مفتوح فيه زيادة حسنات
زي الرأي اللي بيقول ان عمرو بن العاص وغيره من اهل الفتوحات لهم مثل حسنات كل من آمن ووحد الله في بلد نشروا فيها الدين بالفتح او التجارة

بس هنا احنا بنكلم نفسنا بس
والي لهم يد على الإعلام اجنداتهم شيء تاني خالص

~أم حرّوبي~ يقول...

موضوع الزواج صار متعب ...ومن كثر مال ناس تحكي فيه صرنا ما نبغي نتزوج ..ومثل ما قالت Dr/ walaa salah

بلاااش عانس ...مش متزوجين وخلاص

هو في رجاله بتستاهل أصلا !!

تقبلي مروري

سواح في ملك الله- يقول...

معلشانا شايف الحل
ان احنا نخترع راجل بمعني كلمة راجل
الشاب النهاردة ممكن يوصل لسن الثلاثينات من عمره
وهو مش قادر يتحمل مسئولية بيت
عايز يعيش حياتة
ويجري ويتنطط في حفلات ورحلات
وما اسهل الحصول علي صديقه مما يغني
عن الزوجات
وجواز عرفي في الجامعات
صدقني احنا عندنا مثل في مصر بيقول الممنوع
مرغوب
لما كانت الستات قليلة الظهور
كنت مثلا في عرف الشباب
تلاتة او اربع شباب بيتهافتوا عليها
كل منهم عايز ينول رضاها
وكان في تنافس مين اللي هيسبق ويثبت
انه راجل ويخطبها
وكان ده في حد ذاته محفز للشباب انه
يثبت انه جدير بيها
واللي مينولش الرضا ويتجوزها
كان بيسارع ويتجوز واحدة اخري
حتي لو عن غير حب
لاثبات ذاته
تحياتي الطيبة ليك يااخي
ولهذه المدونة التي تفيدنا في جدال مثمر

شيرين سامي يقول...

كان نفسي أتابع من الأول موضوع ساخن جداً و مرفوض قطعاً
بس في انتظار مواضيع أخرى بعيداً عن بناء بيوت على أنقاض بيوت أخرى و اعطاء الرجل احساس بميزة في المجتمع و اشعار المرأه بالدونيه
تحياتي الزياره الأولى و ليست الأخيره ان شاء الله

حسن يقول...

دة موضوع جميل جدا جدا على من كتبة ولك الشكر فى ذكرة
احب ان اقولك شى ان انهاردة المعيشة ليست كافية فى عمل اى شى فى مصر
ولكن اذا تساعد كل من الطرفين فى بناء البيت والمساعدة من الاهل فى مساعدتهم وتكوين بتهم وانا عاوز اقول شى الاب عاوز وعاوز دة بيخلى العريس يهرب ديمن من اول مقبلة ومن هنا يبدا العنوسة للسيدات والرجال ثم تقابل كثير من المشاكل فى الدنيا
واخيران التفكير فى كل شى باذن اللة
كويس للطرفين
تحياتى حسن الشيخ

جايدا العزيزي يقول...

كل كلامك مالوش معنى واحد

ده ليه الف معنى للاسف كل اللى طرحته

مظبوط وكل المشاكل واقع مرير نحياه

البطاله وارتفاع الاسعار

والظروف الاقتصاديه

لازم نعالج مشاكلنا اولا

وهذا ما طرحته بكل شفافيه

حقا طرح مميز وراقى

اتابع
اشكرك

تحياتى

فارسة بلا جواد يقول...

ههههه

من جيث حتنقتل فانت اكيد حتنقتل

بس انا مع التعدد لانه من اسلامنا اولا وشي تاني

اذا نوى الرجل يعمل شيء فحيعمله وع الفاضي الوحدة ممكن تضحك ع نفسها

وبدل ما يتزوج وحدة تانيه

ممكن يخون

وهون الكارثه

يعطيك العافيه
ع المواضيع الشائكه

استمر واكيد احنا بنتابع

هبة فاروق يقول...

موضوع جميل وفعلا الزواج بقى صعب
وخاصا فى الظروف الصعبة اللى احنا فيها
تقبلى مرورى وان شاء الله متبعاكى

فاروق بن النيل يقول...

أستاذ/محمود .........
أشكرك على كلامك الطيب أنا حبيت بس أعرف الناس إن مشكلتنا موش فى الحكومة المشكلة فينا إ؛نا موش عارفين نفكر صح أو حتى نتناقش صح موش عايزين نفهم ( بدون زعل )
أستاذ محمود!!!!!!!!!!!!!!!!!!!
عندك واجب يجب حله موجود بمدونتى لك الحق أن تحله عندك بمدونتك كما فعلت أنا
أو تحله عندى كما تريد وشكرا لك

جميله المصرى يقول...

السلام عليكم

والله هى فعلا مشكله كبيره جدااااا بس انا شايفه ان لو اتوفرت فرص عمل بجد كويسه جزء كبير من المشكله دى هيتحل والله بلدنا فيها خير كتير بس للاسف الخير ده مش ظاهر ..منهوبه..

وتسلم ايدك على طرح الموضوع بالشكل الجميل ده

دمت بخير

اختك جميله

;كارولين فاروق يقول...

السلام عليكم ورحمته وبركاته
بص بقي اجيب من الاخر
ولا اتكلم كلام تعبيري
الست المصريه غيوره
غ ي و ر ه
انا حبيت ااكد بس
مهما اقنعتها بلادله
والقوانين
اي بالشرع والقانون
مش حاتقتنع
وهذا موروث قديم
ولا احد سيشجع هذا
الا الرجاله
اما عن الوقوف بجانب الشباب
ومساعدتهم لكي يتزوجوا
فهذا امر لايختلف عليه
اثنين
وعن الامور التي تحتم الرجل
الزواج باخري فهذا لا
يعيب الرجل في شيء
ولا الزواج باخري بدون سبب
ولكن عند اقامته ببيت جديد
سوف يهدم بيده ايضا القديم

مدونة رحلة حياه يقول...

السلام عليكم
د/ ولاء
متزعليش انا عدلت فى كلام له معنى ولبيت لحضرتك طلبك

مدونة رحلة حياه يقول...

السلام عليكم
شكرا شهر زاد
وشهد شاهد من أهلها

مدونة رحلة حياه يقول...

السلام عليكم
كارمن انا متشكر ليكى ويشرفنى انك تكونى بتابعى مدونتى

مدونة رحلة حياه يقول...

السلام عليكم
ستيته حسب الله الحمش
اقتراحك جميل جدا وبجد عندك حق وياريت يطبق وياريت حد يعمل كدا هيحل كتير جدا
بجد تسلم افكارك

مدونة رحلة حياه يقول...

السلام عليكم
ام حروبى انتى منورانا
بس اكيد هيكون نفسك تتجوزى وساعتها ابقى اختارى رجل

مدونة رحلة حياه يقول...

السلام عليكم
اخ سواح عندك حق وما تراجع الموضوع هتلاقينى ذكرنا الاسباب دية
بس عشان تبنى راجل لازم تاخد خطوة والمقالة خطوة والمناقشة خطوة

مدونة رحلة حياه يقول...

السلام عليكم
شيرن سامى سعيد بمرورك وتنويرك لمدونتى اما حضرك رافضة الموضوع فدا حقك بس لما حضرتك تراجعى الموضوع من اول بوست فيه هتلاقينا مش بنبن بيوت على انقاض بيوت ولا حاجة
لك منى تحية

مدونة رحلة حياه يقول...

السلام عليكم
أ / حسن نورتنا ونورت الدنيا وعندك حق فى كلامك وانا حاولت اشير للاسباب دية فى البوست الاول

مدونة رحلة حياه يقول...

السلام عليكم
جايدا
انا بتعلم منك ازاى اكتب فكثيرا ما استفدت منك
لك الشكر الكثير

مدونة رحلة حياه يقول...

السلام عليكم
ههههههههه فارسة بلا جواد ابقوا بس عرفونى معاد القتل عشان استخبى
دائما اسعد بزيارتك ودوما انتظر تعليقك

مدونة رحلة حياه يقول...

السلام عليكم
هبه فاروق
سعيد ان حضرتك اصبحت تقرأين فى مدونتى
ويارب دوما تفيدنى بما لديك

مدونة رحلة حياه يقول...

السلام عليكم
استاذ فاروق
دايما مدبسنى خليتهم عملوا عليا حملة شرسة وكمان مدبسنى فى واجب
حاضر انتظر منى الرد فطلبك ليس له عندى رفض وهل يخالف الابن والده

مدونة رحلة حياه يقول...

السلام عليكم
جميلة المصرى
فعلا بلدنا فيها خير كثير بس للاسف بنضيعه
شاكرين متابعتك لنا

مدونة رحلة حياه يقول...

السلام عليكم
كارولين الصراحة راحة وكلنا محتاجين لها
والغيرة دا شئ من النار ربنا خلقه فى الستات ولولا ان خلقه فيهم لعاقبهم عليه كما علمنا النبى والزواج دا بيكون ابتلاء لايمانها

ايناس موسى يقول...

ههههههههههههههههه هى فعلا مشكله كبيرة جدا وبتاثر ف جميع بناتنا وع نفسيتهم ونسبتها عاليه ده وع فكرة ده نصيب ومحدش بياخد اكتر من نصيبه لو مكتبلها انها ترتبط هترتبط...وبتنادى ليه يا محمد بتعدد الزوجات حرام عليك انا عن نفسى لو جوزى عمل جدا يبقاء اخر يوم ف عمره ..ويعينى ع الا هترتبط بك يا محمد شكلك من اوائل الا هيجوزوا ع زوجاتهم...وع فكرة الجزاء من جنس العمل....وكان نفسى اشارك ف الموضوع ده من الاول بس مليش نصيب بس الاسم شدنى جدا ههههههههههههههههههه