السبت، 8 يناير، 2011

حكايه

السلام عليكم 
النهاردة جى احكيلكم حكاية زى حكايات كتير من اللى بنشوفها وبنعيشها هى ببساطة 


حكاية شاب مصرى اتولد فى الريف واتربى فى الريف اتولد فى قلبه حب الخير لكل الناس بيتعلم فى الارض وبيتعلم فى المدرسة بيحب كتابه وبيعشق تراب أرضه بيحب يقرأ كتير فى حاجات كتير متنوعه وبيعشق ريحة الارض العطشانة لما تغطيها المايه وتروى عطشها بيحب يشوف زرعه بيكبر قدام عينيه وكأنه ابنه اللى بيتعب عشان يربيه بيمسك كتابه وتحت الشجرة يذاكر وتحت الشجرة ينام ساعات كتير يتعب 


ساعات كتير يشقى وساعات تانية بينجرح بيحب الندى لما يغطى الزرع بيحب النسيم  وضل العصارى لما الزرع بيتمايل ويرقص قدام عينيك بيحلم يكون انسان كويس بيحلم يساعد كل الناس بيحلم ميحتاجش لأى انسان غير رب كل الناس بيقولوا عليه طيب وكمان قالوا حنين اتعود يكون مسئول


 يشتغل وهو بيتعلم زى اغلب ولاد بلادنا عشان يغطى مصاريفه ويشيل من على اهله شوية ما هى الظروف صعبة والعيشة غالية وتمر الايام ويخلص تعليمه ويدور على شغل ولكن ........ يشتغل فى عند الناس وفى المعمار وفى المطاعم وبعد فترة تقريبا سنة يغير طريقه ويشتغل فى مكتب ويستغل كل دقيقة يقرأ ويتعلم ويقلب فى كل الملفات ويسأل كل انسان عنده معلومة عشان يتعلمها منه ويقابل ناس كتير ويتعامل مع ناس اكتر فى ناس يرتاح لها وناس لا بس مش مشكلة يصبر شوية ويتحمل غلاسة دا شوية ويتحمل استظراف دا شوية بس بردوا مش مهم المهم نتعلم المهم نقدر نفيد غيرنا بيغير جدا لما يلاقى حد اشطر منه وايه المانع طالما يقدر يتعلم ويكون زى غيره كويس وفى مستوى علمى مرتفع وتمر اوقات كتيرة وتقابل صعوبات ومع كل موقف يتعلم حاجة جديدة وتزيد مسئولياته ويكمل ماهى دى الحياة يوم تفرح ويوم تبكى يوم معاك ويوم مع غيرك اوقاته بتمر عادية زى اى حد تانى بيحاول يتعلم كل حاجة نقصاه بيحاول يساعد كل محتاج بيحاول يعلم كل اللى عاوز يتعلم بيمد ايده للى يطلب منه مبيفكرش فى فلوس ولا مصلحة ولا منفعة ولا مقابل لأى حاجة بيعملها وتيجى عليه سنة 2010 تواجه صعوبات اكتر وتزيد مسئوليته اكتر فى شغله وربنا يقدره وينجح فيها ويقف جنب ناس وتبان له معادن ناس ناس تنكر مواقفه معاها وناس تقوله انت غلط  اللى بيتعامل مع الناس بشكل هما مش متعودين عليه لازم يكون غلط ما احنا دنيتنا بقت كلها منافع عشان اقف جنبك لازم اكون ليا مصلحة معاك  ومع ذلك قناعته زى ما هى ويكمل فى نفس طريقه جت عليه لحظة وقال مش هعلم حد تانى تعلم دا ويسئ لك وتعلم دا وينكر وتعلم دا ويتمرد ولكن الطبع يغلب التطبع ينسى مواقف الناس واللى يطلب منه تانى انه يعلمه يعلمه كان يتمنى ان 2010 تكون فيها فرح وفرج لكل الناس  بس سبحان الله انت تريد وانا اريد والله يفعل ما يريد جت سنة 2010 ومرت غير متوقعه اغلبها مشاكل من انفلونزا بانواعها وغلاء اسعار دا حتى النيل مبقناش عارفين هنشرب منه ونروى منه ارضنا ولا هيتحاش عننا ومشاكل احزاب وزيادة اعباء واضرابات ومظاهرات ناس كتير بتصرخ ومفيش حد بيسمع صوت وناس كتير بتظلم ومفيش حد يقول لأ وبلاد كتير اتغيرت ونفوس كتير اتشتت لأ بجد سنة غريبة حتى اخر يوم فيها معداش بسلام ارواح كتير بريئة ملهاش اى ذنب اتغدر بيها واتفجرت  عموما اهى سنة عدت بحلوها وبمرها وجت السنة الجديدة وجاية سخنة من اولها مشاكل فى التعليم من ناحية والمدارس  والناس اللى عاوزين يزرعوا فتنة فى شعب طيب ونقى مهما اتقال عليه غير كدا 

بيتمنى فى 2011 انه ميشوفش فى عينين دمعه بيتمنى يشوف كل واحد فى المكان اللى يستاهله بيتمنى تتملى بلادنا وقلوبنا بالخير بيتمنى بلادنا ترجع امن وسلام زى ما كانت طول عمرها بيتمنى بلادنا ترجع ام للبلاد ووطن للعلم وارض للزراعة ومنتج لكل صناعة بيتمنى الفقير يلاقى لقمته وهدمته بيتمنى ميشوفش او حتى يقرا ان حد بينتحر عشان مش لاقى شغل او مش عارف يتجوز او مش لاقى يصرف على عياله بيتمنى الناس تعرف ان الله وحده هو اللى بيحاسب على الدين مش احنا فلا اكراه فى الدين بيتمنى نظرة الناس تتغير لبعضها منبوصش لمحتاج على انه محتاج ما كلنا ممكن نكون مكانه بيتمنى ميشوفش وسط الناس يتيم محتاج ولا فقير محتاج ولا طفل له احتياج خاص  ومش لاقى اللى يساعده بيتمنى كل الشباب تشتغل وكل البنات تتجوز بيتمنى كل شبر فى ارضه يتحرر بيتمنى الخير يعم الدنيا ويملاها السلام بيتمنى الاخلاق ترجع لشوارعنا وبيوتنا بيتمنى الاعلام يرجع نضيف وله معنى بيتمنى الناس كلها ترجع تخاف على بعضها بيتمنى ميشوفش بنت ماشية فى الشارع او فى اى مكان خايفة من تحرش او اغتصاب بيتمنى يرسم ضحكه على كل وش حزين بيتمنى يتعلم ويعلم لحد اخر نفس بيتمنى  يسعد كل الناس بيتمنى صوته يوصل للكل ويأثر فيهم بيتمنى ربنا يحسن ختامه وختام الناس كلها ويغفر للعالمين .
دى كانت الحكاية ودا كان واجب من الاخت كيالة عبارة عن مجموعة اسئلة  يمكن ميفيدش ناس كتير بس اهو اتدبست والسلام انا مش هحول الواجب لحد بس اللى عاوز يحله يتفضل 
تقبلوا تحياتى وانتظروا البوست القادم 

27 رأيك يهمنى:

اعقل مجنونه يقول...

بس واجب ظريف

مدونة رحلة حياه يقول...

السلام عليكم
اعقل مجنونه
هو الواجب مكانش كدا
بس انا خرجته بالشكل دا عشان ابعد عن الاسئلة اللى تستجوبنى
شكرا على مرورك

faroukfahmy58 يقول...

اسلوبك اسلوب السهل الممتنع ، السهل على من يسهل الامور مهما كانت صعبة، والممتنع على من يصعب الامور مهما كانت سهلة وعلى الرغم مما صورتيه عن عام 2010 الا انك استقبلت عام 2011 بكل الامل والرجاء احسنت فىسينك وجيمك مع تحياتى

مغربية يقول...

حكاية جميلة

غير معرف يقول...

ونحن نتمنى أن تتحقق جميع أمنياته ..
وكل عام ومصر وكل مافيها بألف خير ..


نور خالد
مدونة فنجان شاي

شهر زاد يقول...

هي فعلا رحلة حياة
اصطحبتنا في مركب من مراكب النيل الجميلة لتحط رحالها على كل أماني الناس الطيبة الي لسه موجودة في الدنيا والي رغم انها بتتعذب وتقاسي بس مش قادرة تتطبع علشان معدنها أصيل
انت لخصت العقدة والحل واديت المفيد
هي لخبطة عيشينها مش في بلاد الكنانة بس بل في كل الوطن العربي
بس الجميل ان الطيب دايما بيعيش على الامل في ربنا والامل في الدنيا انها دور وشها له وتاخدو بالاحضان والاجمل انو مبيتمناش دا لنفسو بل لكل الناس
يااااااااااه
ياريت العدوى تنتقل لكل الناس ونشم عبير الخير من جديد ونحس بدفئ الحنان بين الناس من تاني
ياليت ترجع الجورة والعيلة والاسرة
ياريت يحيا المعروف والصدقة والاحسان
بس تعرف
احنا مش حنيأس بالعكس انت وانا والثالث والرابع نمسك في ايد بعض ونكتب الخير وننشرو بين الناس
انا بهنيك على قصتك الي بتحكيك وتحكيني وتحكي حال كل طيب في زمن بقت الطيبة فيه غريبة على اهلو
اسفة على التطويل
تحياتي

جايدا العزيزي يقول...

شخصيه جميله وطيبه ومحبه للخير

انا ايضا اتولدت فى الريف

وعارفه ان بداخلهم اصاله ونبل وكرم

واجب جميل من انسان اجمل

شكرا لك

وسعيده بجوانب شخصيتك الرائعه

بالتوفيق

تحياتى

عمرو يقول...

اهاجر واسيبك لمين

ولسه صبيه ونيلك حزين

ولسه لبكره مليكي الحنين

اسيبك لمين

رغم اننا بنهاجر ونبعد غصب عننا ومن

اللى بيحصلنا بس اكيد هنرجع

وهنخليهااجمل وهنفضل نحلم ونحول احلاآآمنا حقيقهـ

سلمت وسلم لنا قلمك المبدعـ

كل التحيهـ ,,

فارسة بلا جواد يقول...

السلام عليكم

ع الغم من انه كتير ناس لما بسمعوا عن الأحياء الفقيرة بقولوا دول ناس بس همهم لقمة العيش ع قولتكم

لكن الحقيقه انها تخرج موهوبين وناس طموحه كمان


انطلاقا من مبدأ الحاجه أم الختراع

ومادامه عنده هاد الطموح ما بكفيه وجودها من غير الاراده والصبر

ورح يحققها ع الأكيد مو مستحيل
بس بحاجه الى ضريبه حياتيه

راق لي موضوعك ويمكن منشانه خفيف توترنا فيه كان قليل

المنشد أبو مجاهد الرنتيسي يقول...

بسم الله وبعد
بوركت على هذه الحكاية الرائعة وبورك جهدك

:)

carmen يقول...

شخصية جميلة جدا وطيبة جدا مهما الدنيا عملت فيه دايما حاسة ان كله اصرار وعزيمة
خالص احترامي لك

سواح في ملك الله- يقول...

ربنا يوفقك وتحقق امنياتك

هبة فاروق يقول...

نتمنى من الله ان تحقق ما تتمناة
تحياتى لك

فاروق بن النيل يقول...

محمود( مدونة رحلة حياة..........
أولا : المعدن الطيب النفيس لايصدأ
ثانيا: من شب على شيئ شاب عليه
ثالثا:من تواضع لله رفعه
رابعا: من كان فى حاجة أخيه كان الله فى حاجته ومن نفس عن مسلم كربة من كرب الدنيا نفس الله عنه كربة من كرب يوم القيامة.
خامسا: الله فى عون العبد مادام العبد فى عون أخيه
سادسا:إتبع السيئة الحسنة تمحوها وخالق الناس بخلق حسن
سابعا: أنت رجل طيب وسوف تكون كذلك حتى آخر عمرك
ثامنا: كل ماتفعله من خير سيرد إليك إن عاجلا أو آحلا من الله
تاسعا: الريف دائما يصفى الإنسان ويجعله يتعلم الصبر والحب والحنان والإحسان والبر
عاشرا: أتمنى لك عاما جديد 2011 سعيدا وأن يوفقك الله لزوجة صالحة ترزق منها ذرية صالحة إن شاء الله

أم هريرة (lolocat) يقول...

السلام عليكم ورحمة الله

اجمل شىء فى هذا الواجب ان انا شعرت انك حاولت تطلع شحنة من غضب وشجن داخلك
شعور مدفون جواك بعذاب السنين وشوق للذكريات الطيبة والارض لما ترويها الماية ... الخ

انت انسان جميل اخى جواك الفلاح الاصيل اللى متمسك بجذوره ويفتخر بها بكل مافيها

تشرفت بمعرفتك و اسعدتنى خواطرك هنا
((حقيقى رحلة حياة ))

فهمت معنى العنوان لمدونتك الان وشعرت بكل مافيه

تحياتى لك اخى ويارب يحقق كل ماتتمناه ان شاء الله

الكيل بمكيالين يقول...

مساء الخير وكل عام وأنت بخير :))
أحييك على حل الواجب بهذه الطريقة الجميلة والممتعة..
جمال الحياة في صعوباتها ومواقفها وأروع ما فيها أن يتعلم الانسان من (كيسه الخاص)..
يعجبني الانسان العصامي فهو انسان بحق ومن أجله كانت الحياة...
أدام الله الخير وأهله ووفقك الله لكل ما يحب ويرضى وإنشاء الله تتحقق كل أمانيك وتتيسر الحياة من أجلك وأجل كل شبابنا وبناتنا..
دمت بخير..

;كارولين فاروق يقول...

السلام عليكم

انت وضعتنا في حيره
هناك من فهمه انها قصه
من تأليفك والبعض عرف
انها قصتك
عموما
هي قصه جميله عيشتها
انت بحلوها وبمرها
وكانت فعلا سنه صعبه
ونتمني عدم تكرارها
تحياتي واحترامي لك

حرّة من البلاد..! يقول...

اسلوب جميل في طرح الواجب
شخصية طيبة ورائعة
اتمنى ان الخير يعم عليك وعلى بلدك وعلى بلاد المسلمين
ان شاء الله في النجاح بحياتك
تحياتي

تركي الغامدي يقول...

طرح مختلف اختصر رحلة يمر بها أي إنسان تعركه الحياة بكل تناقضاتها .
تحياتي لشخصك الكريم .

محمد الجرايحى يقول...

أخى الفاضل
بارك الله فيك وأعزك
رحلة طيبة نتمنى لها أن تستمر مصحوبة بالأمنيات الطيبة ويكون القادم أحسن من الماضى.....

تقبل خالص تقديرى واحترامى
بارك الله فيك وأعزك

مدونة رحلة حياه يقول...

السلام عليكم
شكرا ليكم جميعا شرفتونى واسعدتنى اراءكم انا حاولت اعرض لكم صورة شخص مصرى بسيط فى كل حاجة من غير تجميل زيه زى باقى المصريين والعرب وكل انسان بسيط
شكرا على تواجدكم معى

Beram ElMasry يقول...

اخي الكريم مدونة رحلة حياة

وعليك السلام ورحمة الله وبركاته
شكرا جزيلا لاطرائك واسعدني مرورك والتعليق وصدقت يااخي ان اي خطر يلحق فئة منا فانه يعود بالشر علي الفئة الاخري
فمصر سفينة ونحن ركابها فاذا عطبت ضعنا جميعا... فليحفظها الله ويحفظ المستنيرين من امثالك
سلام ولاسلام مع بني اسرائيل

فشكووول يقول...

السلام عليكم
تحياتى
سنة 2010 كانت سنه صعبه قوى ومتعبه قوى وسنة 2011 بدأت بدايه ما تشجعش ..
بس شفت الريف حلو ازاى .. شفت الصوره اللى انت مصورها او منزلها .. شفت ازاى الواحد يقدر ينظر فى الافق الا مالا نهاية بعكس البندر اللى الواحد ما يقدر ينظر اكثر من 10 او 20 متر قدامه ويلاقى متاريس من العمارات وما يحجب النظر عن عينيه
تحياتى

re7ab.sale7 يقول...

ده واجب ده
لالالالالالالالالا
دي حاجة حلوة
الصور بجد رائعة القصة اروع
دمت بخير ويا رب انتياتك دي تتحقق لاننا كلنا بنتمناها

بنوتة مصرية يقول...

اولاَ الشاب دة اللى هو انت .

ثانياَ 2010 دى كانت سنه غريبه وعجيبه وكانت رخمه جدااااا انا عن نفسى محبتهاش

ثالثاَ حلو الكفاح اللى الشاب دة مصمم يكمله للنهايه ..

ويارب 2011 تكون خير على الشاب دة وعليا وعلى كل الناس ياااااااااارب

ممكن تتقبل مرورى

نبيلة أحمد يقول...

شكرا لك أخي المدون على هذه الأجواء الساحرة التي حلقنا معك عبرها في الريف المصري والمواطن البسيط في أحلامه وأمانيه ونشكرك على هذه الحالة الإبداعية الفريدة ...

سكرتيرة جديدة يقول...

نوع جديد من الواجبات
شدنى اخلصه لاخره

وهو ده الطبيعى من بنك مصر

اقصد هو ده التطور الطبيعى للحاجه الساقعه

لا برضه اقصد ان دى حالة شباب كتير فى مصر

ربنا يبارك فيك
:)