الأحد، 11 سبتمبر 2011

لقاء الاسكندرية الاول

استيقظت فجر اليوم السبت الموافق 10/9/2011 وبعد أن من الله عليا بأداء الصلاة جلست اكتب الجزء الذى تم اضافته فى البوست السابق متفرقات ونشرت بعض الكتابات على الفيس بوك وفى تمام الخامسة والنصف بدات اتوجه نحو الموقف لأستقل السيارة المتجهة نحو القاهرة فى بداية رحلتى الى الاسكندرية بناء على الدعوة من الرائعة دودو عاشقة الرومانسية ومدونى الاسكندرية الرائعين  وصلت الى رمسيس فى حوالى الساعة السابعة الا ثلث وتوجهت الى محطة القطار لاستقال اول قطار متجه الى الاسكندرية ولكنى لم أجد مكانا فيه حسب ما قدره الله فخرجت الى امام المحطة حيث تقف السيارات المتجهه الى الاسكندريه ومن هناك استقليت اول سيارة متجهه نحو الاسكندرية وبدانا التحرك من القاهرة فى الساعة السابعة والنصف تقريبا .
هم السائق ليتحرك بالسيارة فاذا بها لا تعمل فضحكت مما حدث وانا اتسائل كيف ستصل بنا الى الاسكندرية وهى بهذا الشكل اعتقد اننا سنظل طول الطريق ندفعها ثم سنصل الى هناك حبوا ههههههههههه..
تحركت السيارة بحمد الله سريعا وهذه هى المرة الاولى لى التى أزور فيها مدينة من احب المدن الى قلبى رغم عدم زيارتى لها مسبقا قضيت الطريق الصحراوى أشاهد  جانبيه حسب عشقى لاستطلاع ما لم امر عليه او اشاهده من قبل حتى وصلنا الاسكندرية فى الساعة التاسعة والنصف تقريبا وهناك نزلت فى محطة مصر .
 من هنا استقليت الباص المتجه الى العصافرة بمساعدة احد المسافرين الذى تعرفت عليه فى الرحلة من القاهرة الى الاسكندرية ونزلت من الباص امام نادى التطبيقين وهو المكان المقرر للتجمع فى حدود الساعة 10.20 تقريبا .

من خلال النفق انتقلت الى الجانب الأخر من الطريق حيث يقع نادى التطبيقين ثم اتصلت بمنسقة التجمع والتى كانت تقف بالقرب منى على الجانب المقابل من الطريق والتى سعدت جدا عندما علمت بحضورى وأشكر لها ذلك كثيرا .
التقيت وانا بالخارج منتظرا منسقة التجمع اسلام نور صاحب مدونة دعوة للتفكير وهو شاب جميل ذو خلق رفيع وأدب جم سعدت جدا بلقائه وتعرفت عليه عندماوجدته واقفا بجانب النادى يسأل عن وجود تجمع من عدمه ؟
التقيت بها وكان معها شاب جميل اسمه اسلام وهو احد اقاربها واثناء وقوفنا سويا وجدت هاتفى يرن ويتصل عليا اسامة ناصر (مدونة باب مقفول ) وهو الوحيد من بين الحضور فى التجمع الذى كان يعلم بقدومى وكنا على اتصال سويا اثناء الطريق وفى هذه الاثناء قدم الينا احمد صاحب مدونة اسير الجراح وهو شاب اسكندرانى صغير السن ويتمتع بروح جميلة .
دخلنا سويا النادى وبدا الاخرون يقبلون الينا واحدا تلو الاخر بدات بنور شريف وهو شاب صغير يدرس فى المرحلة الثانوية العامة ذو حياء جميل وادب رفيع واقبلت بعده الجميلة  رونى (ليس فقيرا من يحب ) واحضرت معها ما صنعته بيديه من حلوى العيد واشكرها كثيرا لسعادتها برؤيتى هناك ثم قدمت الينا الرائعة ايمى (الحب الجميل ) والتى كانت تتوقع حضورى ولها دور كبير فى قيامى بذلك فاشكرها مرارا وتكرارا وتلاها حضور ملكة الابتسامات والفكاهة مرمر واسامة شركاء صاحبى (مدونات ابتسامات - حواديت ) والتى كانت مسرورة بقدومى ايضا ، تلى ذلك حضور الجميلة فاتيما (روح قلب ماما ) وصاحبها أسامة الازهرى ومصطفى ريان وعمرو يسرى وكلهم معروفون فى عالم التدوين وجميعهم يتميز بالادب والروح الطيبة سوى ان الازهرى استولى على الشيكولاته ههههههههههه وكنا نعد لقيام ثورة ضده لولا تركه لها بعد ان اوشكت على النفاذ فكانت روحه تضفى على التجمع مظهر رائع وساد جو من البهجة على كل الحضور واكتملت الفرحة بحضور ماروووو(قلب القطة ) وكانت المفاجاة حضور مريهان ومروان معها مما جعلنا فى فرحة شديدة واشكرها على حسن استقبالها لى كثيرا كثيرا .
واتصل علينا كثيرا ممن لم يستطيعوا الحضور بسبب ظروف طارئة (ريم رسائل بلا بريد - تخاريف عقل وقلب - اليكس مون - مونتيه بوكيه ورد - حنين - رامى)واخاف ان اكون نسيت احد فلهم جميعا كل الشكر والتقدير واتمنى لقائهم قريبا ان شاء الله .
قضينا بعض الوقت فى نادى التطبيقين تعرفنا فيه على بعضنا البعض وتحدثنا جميعا فى جو ساده الحب والبهجة والاحترام  من الجميع للجميع وتناولنا بعض المشروبات كل حسب طلبه .
خرجنا من النادى متجهين نحو متحف المجوهرات واخترنا ان نقطع الطريق سيرا على الاقدام لتتاح لنا فرصة للتعرف والاستمتاع بجمال الاسكندرية اكثر  ولما وصل من سبقنا الى المتحف فوجدوه مغلقا فقررنا الذهاب الى بحرى لتناول الغذاء هناك .
عدنا الى بداية الطريق على البحر مجددا واستقلينا السيارات حتى وصلنا الى بحرى واختاروا مطعم الزعيم لتناول الغداء فيه  حسب رغبتهم وتناولنا الغذاء والتقط اصدقاؤنا بعض الصور لنا وللجميع .
وبعد الانتهاء من ذلك اتفقنا على ان تقوم برحلة بحرية فاستقلينا احد المراكب وقضينا ساعة من اجمل الاوقات التى قضيناها فى هذا اليوم الرائع بجملته  كنت اجلس متابعا البسمات والبهجة المرسومة فى عيون الحاضرين وعلى وجوههم وهما يلعبون ويلتقطون بعض الصور .
انتهينا من رحلتنا البحرية والتى استمتعنا بها جدا وبهواء ونسيم البحر الجميل وبخفة ظل الحضور قرابة المغرب قررنا بعدها الذهاب تجاه حلوانى الشيخ وفيق بناء على طلب الاديب الجميل مصطفى ريان ـ وقبل اتجاهنا نحو الحلوانى فارقتنا ايمى (الحب الجميل ) لاضطرارها العودة الى بيتها بعد ان بهرتنا بجمال روحها وخفة ظلها وحسن ضيافتها وروعة ذوقها وادبها معنا فلها كل التحية .


وصلنا الى الحلوانى وتناولنا هناك حلوى من احلى ما تكون ثم ذهبنا لصلاة المغرب وقررنا العودة مجددا الى ديارنا مودعين بعضنا املين فى لقاءات قادمة تجمعنا سويا قريبا ان شاء الله بعد ان شكرنا مضيفينا ومستقبلينا اهل الاسكندرية الكرام .
توجه كل منا فى اتجاه طريقه فتوجه كل من أسامة ورونى نحو طريقهم وكان من المقدر السعيد لى أن اعود الى القاهرة برفقة اسامة الازهرى ومصطفى ريان وفاتيما  وهو ما سمح لى بالاقتراب منهم اكثر حيث قدر الله ان نتأخر فى السيارة حيث قضينا فيها ما يقرب من اربعة ساعات سمحت لى هذه المدة بالاقتراب من فكرهم وثقافتهم وارائهم وروحهم الطية التى ابهرتنى واسعدتنى جدا فلهم منى شكر خاص على هذا الوقت الجميل الذى قضيته برفقتهم .
خلاصة يومى انى تاكدت انى كنت أقل الحاضرين ثقافة وعلما وحضورا بينهم فقدر الله لى التواجد بينهم حتى اتعلم منهم الكثير مما افتقده فلله الحمد والمنه على ذلك .
فى نهاية البوست اقدم لهم جميعا الشكر والاحترام والتقدير واتمنى الالتقاء بهم كثيرا كثيرا واشكر دودو منسقة اللقاء وكل اهل الاسكندرية الذين أكرمونا وسعدوا بنا واشكر الذين لم يقدر لهم الحضور ايضا وربما نلتقى قريبا ان شاء الله .

51 رأيك يهمنى:

ليس فقيرا من يحب يقول...

بخخخخخخخخخخخخخخخخخخخخخخخخخ

والله مبسوطين بيك جدا جدا يا ابو معاذ

لانك انسان نقى جدا وطيب بجد لا وكمان فوجئت بخفه دم غير عاديه ومرح منقطع النظير وهات بقى علبه الكحك اللى انت كنت سارقها منى باسيحلك اهوووو انت تسرق الكحك واسامه يسرق منى الشوكلاته ايه الافترا ده هو علشانى طيبه بقى ههههههه
بالرغم من انى دوخت اخر اليوم الا انى بجد استمتعت بكل ثانيه
وباتمنى يتكرر اللقاء قريب واشوفك على خير
اسعدك الله حمايا الغالى

eng_semsem يقول...

يوم جميل فرحنا بيه كلنا ولقاء قابلنا فيه ناس كلهم في غاية الادب والاحترام وفعلا رحلة اميه كانت احلى ما في الرحله كان الكل ابتسامته مرسومه على وشه طول الرحله
يارب تكرر تاني ان شاء الله

شهر زاد يقول...

شوقتيني يا محمد والله
الف بركة انكم شوفتو بعض
ربنا يخلي كلمتنا موحدة يارب
تحياتي

BNT ELISLAM يقول...

انا زعلانه اوى اوى اوى
اوى اوى اوى
انى مش جيت وزعلانه اهىء اهىء
حمدالله على سلامه وربنا يزيد المحبه يارب كمان وكمان يارب يكتب ى اللقاء معاكم يارب

جارة القمر يقول...

يارب دايما متجمعين يارب يا محمد
ومبسوطين كدا وفرحانين

لـــولا وزهـــراء يقول...

كل قاء وانت بخير وسعاده واكيد اسكندريه كانت منوره بتواجدك وتواجد صحبه جميله ربنا يجعل كل ايامكم خير وسعاده

ان شاء الله نتقابل فى المرات القادمه


زهراء

richardCatheart يقول...

نورتنا يا ميتو والله وسعيده فوق ماتتخيل بشوفتك وشوفتكم كلكم والله الحمد لله ان اليوم عجبكم واتبسطنا كلنا الصحبه اللى كانت معانا كانت فعلا صحبه ورد جميله عقبال كل مره بالخير يارب

sony2000 يقول...

كنت عوزا اجي
بس قدر الله وماشاء فعل
فكايرو المره اللي جيه بأذن الله

شيماء علي يقول...

يارب دايما كده متجمعين و مبسوطين و يديم عليكم الحب و المودة .
تسلم ايدك يا متولي الصور جميلة اوي.

الحــب الجميـــل يقول...

السلام عليكم

برغم بعدى عن التدوين من فتره لكن لازم اجى أعلق الا اللى مش هيعلق هيتعلق
ههههههههههههه

نورتنا يا محمد وسعدنا بوجودك جدا
واتشرفنا بمعرفة أخ مهذب فى غاية الاحترام

ومجموعة الناس كانت من أحلى الناس

ربنا يديم كل المعروف والخير بين الجميع يارب

وان شاء الله تتكرر تانى وتالت و ...

ربنا يسعد ايامكم دايما يارب

لـــولا وزهـــراء يقول...

اسمحلي ان ابد
أ من الاخر من اخر ما كتبت طوال السرد وانا مبتسمة وسعيدة يمكن لاني حسيت بكل كلمة كتبتها فاتنقلنا شعورك بالفرح معاها لكن اخر السطور مستفذة قوي انت كمان شخصية ما شاء الله مثقفة ومرحة ومحترمة وجميعكم نحسبكم على خير ابا معاذ ربنا يسعد كل ايامك

لولا

shemo_ joker يقول...

السلام عليكم....


ازيك يا محمد اول مرة احى مدونة وان شاء الله مش اخر مرة .


وبجد عجبنى اوووى التفاصيل الى ذكرتها عن لقاء الالسكندرية خصوصا انى ماتاحتشلى الفرصة انى اجى فكنت عاوزة اعرف ايةا لى حاصل وانت ذكرت التفاصيل ......وان شاء الله يبقى فى لقاء تانى وربنا ييسر الحال واعرف احضر واشوفكم كلكم بأذن الله...



وربنا يديم التواصل والود يارررررب

دومت بخير
فى رعاية الله
shemo

عاشقه الرومانسيه يقول...

نورت اسكندريه ياابو معاذ :)
فرحانه بحضورك وبروحك الحلوه اضعاف فرحتك باليوم
ربنا يكتب لنا لقاء قريب ويكون فيه كل احبابنا اللى مش قدروا يحضروا المره دى
ويجعل لقاءنا دايما فى الخير يارب

mrmr يقول...

ياهووووووووووووووو
هههههههه
القاء كان من اجمل ما يكووون
سعيده انى اتشرفت بشخصيه ذيك يا محمد
ربنا يديم المحبه
ونلتقى جميعا على خيرررررر
يااااااا (( اقوووول )) ولا بلاش
اصل الحال من بعضه هههههههه والناس محرجه
ياخراشىىىىىىىىى

Noha Saleh يقول...

واضح انه كان لقاء جميل اوى
كان نفسى اكون معاكم
بس حضرتك وصفت اللقاء وكأننا معاكم بالظبط:)

اسلام نور يقول...

جاء وصفك للقاء يامحمد ، فى منتهى الجمال والاحساس العالى ، ومعبر جدا عن الواقع ، فأتمنى يتكرر مثل هذا التجمع الرائع

مصطفى سيف يقول...

الحمد لله ان اللقاء كان جميل وقد سعدتم به
فكرة تجمع المدونين فكرة جميلة بتساعد على التواصل وزيادة الالفة والمحبة في عالم التدوين
واضح كان اللقاء جميل اوي ربنا يجعل كل ايامكم جميلة

شهرزاد المصرية يقول...

يا بختك يا عزيزى بهذه الرحلة الموفقة و لقاء زملائنا المدونين الذين للأسف لم أقرأ لأحد منهم حتى الآن و لكنى سأفعل إنشاء ألله

إسكندرية وحشتنى جدا ووالله هيجت شوقى إليها بهذا البوست
تحياتى لك

فاتيما يقول...

ازيك يا أبو معاذ

مين دى الجميلة
انا يا بتعاكس
يانتا عاوز تعمل نوضارة بقى

هههه

بص
انا مش هعرف اقول حاجة
بس انتا أصلا اول ما يتبص ف وشك
ينعرف علطول انك راجل طيب
سيماهم على وجوهم يعنى
وانا اتشرفت بصحبتك ف المراوح
انا وازهرى ومصطفى
ومعلش كلت دماغكو
بس مصطفى نكشنى ى ى وحيث انى نون النسوة الوحيدة كان لازم اعمل محامى بقى وقوق انسانانات وكدا ...


اليوم كان روعة بجد
وان شاء الله يتكرر تانى

هيا اسكندرية كدا
معمريش روحتها
ورجعتنى مكسورة الخاطر

اهلها
وبحرها
و روحها غير كل الاماكن



كل لقاء تدوينى
وانتا معانا إن شاء الله

Nour Sherif Mohammad يقول...

كان يوم جااااامد جداااااا D :D:
بجد انا اتشرفت بمعرفتكو و بكوني كنت معاكو في اليوم التحفة ده D :D:

مونتي بوكيه ورد يقول...

مساء الورد علي الحلوين و الناس ال بنشوفها نتفائل كدا ونحب الدنيا بطيبتهم بصراحه انا مكنتش متخيلك كدا يا قريني انا كنت فاكرك جد كدا و رصين يعني والله مش بقلل منك بس شخصيتك الحلوة خلتني دايما مشوفكش صغنون كدا ماشاء الله عليك مبتسم و روحك حلوة و كل القلوب الجميلة ونجوم جروب كلمات و الغاليه فاتيما كانوا منورين و تشرفت بسماع صوت اللي حظي كان حلو وسمعت صوته داليا وفاتيما و كان نفسي اسمع صوتك و صوت مارو وايمي واسامه و كل اصحابي ال بحبهم و مرمر كانت منوره ومحبتش تظهر في الصور ينفع كدا يا مرمر منشوفش ال متعتنا بسفرتها الجميلة طول شهر رمضان .. خلاص انا لازم اعمل لقاء واشوفكم وفي المنصورة و دا قرار عسكري واجباري واللي مش هاييجي هاجيبه بقانون الطواريء .. يارب يفرح ايامكم و يسعدكم و تتجمعوا دايما علي خير يااااااااااااارب
علي فكره انا محمد متولي عبدالعزيز مونتي بوكيه ورد بس مونتيه منك زي العسل سيبها عشان خاطري هههه

محمد الجرايحى يقول...

السلام عليكم ورحمة الله وبركاته
ماشاء الله من الواضح من كتابتك أن اللقاء كان رائعاً والصحبة كانت طيبة
أدام الله عليكم جميعاً نعمة المودة والصداقة الحقة
وشكراً لك أخى الكريم : محمد
لأنك أتحت لنا هذه الفرصة الطيبة والسعيدة من خلال مدونتك
وتقبل تقديرى واحترامى

فشكووول يقول...

السلام عليكم
تحياتى

دايما الواد الازهرى دا عامل مشاكل فى كل حته يروح فيها ويعمل فصول كتير خد بالك منه لما تقابله تانى واوعى تقول له ان عمك فشكول هو اللى فتن عليك

تصور انى كنت فى اسكندريه الاسبوع اللى فات ورجعت يوم الجمعه العصر ولو كنت اعرف كنت قعدت كمان السبت .. ومش مشكله شويه مصاريف زياده وخلاص وكان نفسى مره احضر تجمع مدونى الاسكندريه وخصوصا ان فاتيما \ منى الشاذلى المدونين| بتحب تروح اسكندريه

وكانت صحبتك فى العوده جميله بس من غير الازهرى المزعج
على فكره دى فشكوول الجديده بعد من انتحرت فشكوول القديمه فى بحر اسكندريه

تحياتى

مدونة رحلة حياه يقول...

ليس فقيرا من يحب
استمتعت جدا بوجودى معكم وبروحك الطيبة الجميلة
دومتى بخير ابنتى

مدونة رحلة حياه يقول...

م اسامة
ان شاء الله تتكرر تانى وتالت ونتجمع على خير ان شاء الله وربنا يديم المعروف ما بينا

مدونة رحلة حياه يقول...

شهرزاد
ربنا يعزك
تنورى وقت ما تيجى كلنا تحت امرك ونتمنى وجودك بينا

مدونة رحلة حياه يقول...

بنت الاسلام
متزعليش تتعوض فى مرات تانية كتير ان شاء الله
ربنا يقدم الخير دايما

مدونة رحلة حياه يقول...

جارة القمر
يارب ان شاء الله
نتجمع ونتبسط ونفرح كلنا دايما

مدونة رحلة حياه يقول...

السلام عليكم
الاسكندرية منورة بأهلها
ان شاء الله نتقابل قريبا

مدونة رحلة حياه يقول...

ماروووو
ربنا يخليك
وانتم كنتم احلى ما فيها بطيبتكم وجمال اخلاقكم
ربنا يجمعنا بخير دايما

مدونة رحلة حياه يقول...

سونى
ان شاء الله المرة الجاية نتقابل كلنا ان كان مقدر لنا ذلك
دومت بخير ابنتى

مدونة رحلة حياه يقول...

شيماء على
ربنا يخليك يا ابنتى
وان شاء الله المرة الجاية تكونى منورة مصر ونتقابل كلنا

مدونة رحلة حياه يقول...

وعليكم السلام
ربنا يخليك ايمى ومتشكر ليك جدا
ومتشكر ليكم على ضيافتكم وحسن استقبالكم

مدونة رحلة حياه يقول...

لولا
ربنا يعزك ويسعدك ومتشكر على الشهادة اللى اعتز بيها دى
دومتى بخير

مدونة رحلة حياه يقول...

شيماء
نورتى المدونة
وان شاء الله نتقابل فى المرات الجاية

مدونة رحلة حياه يقول...

دودو
ربنا يخليك احنا فرحانيين بلقاءكم ومقابلتكم جدا ربنا يسعدكم

مدونة رحلة حياه يقول...

مرمر
هههههههههههههههههه
ربنا يخليك انا اتشرفت بيكم وبيك جدا
ربنا يجمعنا على خير

مدونة رحلة حياه يقول...

نهى صالح
ان شاء الله المرات الجاية نكون فيها كلنا
ربنا يعزك

مدونة رحلة حياه يقول...

اسلام نور
ربنا يخليك انا اتشرفت بمعرفتك فى اللقاء دا
وربنا يجمعنا على خير ان شاء الله

مدونة رحلة حياه يقول...

مصطفى سيف
ربنا يعزك يا مصطفى وان شاء الله تاكون معنا فى المرات الجاية

مدونة رحلة حياه يقول...

د شهرزاد
ان شاء الله نتقابل فى مرات جاية وتكونى معنا ودا يشرفنا جدا يا دكتورة

مدونة رحلة حياه يقول...

السلام عليكم
ازيك فاتيما وازى يوسف يارب تكونوا بخير
طبعا جميلة انتى نسيتى ان عندى نظارة ههههههههههههههه
لا بجد انا استمتعت بيكم جدا وفرحت انكم كنتم معايا فى رحلة المراوح عشان اقرب من فكركم وثقافتكم اكتر
دومتم بخير

مدونة رحلة حياه يقول...

نور شريف
انا اتبسطت بمعرفتك جدا يا نور
عاوزك تبقى مجتهد وفنان وكاتب رائع
مستنى نتقابل تانى ان شاء الله

مدونة رحلة حياه يقول...

مونتى
مساء الجمال على عيونك يا قربينى
ان شاء الله نتقابل فى المرات الجاية وانت تؤمرنا ومش محتاج تخدنا بقانون الطوارئ دا حد تانى هيخدنا بيه هههههههههه

مدونة رحلة حياه يقول...

وعليكم السلام استاذى محمد الجرايحى
كان نفسى تكون معنا
ان شاء الله نتقابل عشان استفيد من خبرة حضرتك

مدونة رحلة حياه يقول...

فشكككككوووووووول
حمدالله ع سلامتك نورت الدنيا تانى
لو اعرف ان حضرتك هناك كنت اتصلت بيك عشان نتقابل يالا خر تتعوض فى المرات الجاي ان شاء الله
دومت بخير

L.G. يقول...

من الجميل التجمعات التدوينية ليتني عرفت كنت حضرت لأنيمن الاسكندرية العجيب ان التجمع الوحيد لي كان في المنصورة ولم أحضر أي من تجمعات الاسكندرية

سؤال هي الصور ديه انت صورتها ولا من على النت اصل شكل الدنيا مش كده خالص :)))
ليتنا نتجمع اكثر ونعمل حزب المدونين
تحياتي للجميع وعلى أمل بلقائهم

مدونة رحلة حياه يقول...

l g
كنا نتمنى وجودك معنا ولكنها ارداة الله ربما نلتقى مرات اخرى
الصور اللى فى البوست هنا من على الانترنت
صور التجمع موجودة فى بيت المدونين
دومتى بخير

norahaty يقول...

مش حاقولك غير
يااااااابختك
لقاء وصحبة
جميلة لن
اتمتع
بها أبدا!

norahaty يقول...

وبعدين مصور البحر
ومحل الشيخ وفيق
ياررررراجل!!!

بنوتة مصرية يقول...

تدوينه جميلة رغم انها قديمه يا رب دايما متجمعين الحياة حلوه بالناس اللى بنحبها ..
عيد 2012 قرب بعد كام يوم ان شاء الله تعود بكم ذكريات العيد الماضى وتتجمعوا تانى فى الخير ..