الجمعة، 23 سبتمبر 2011

الانتحار مشكلة تهدد العالم

اتخنقت الدنيا صعبة والعين بصيرة والايد قصيرة مش لاقى شغل اعمل ايه 
عاوز اتجوزها واهلى مش موافقين واهلها مش موافقين يااااااااااااااااااااااااا ايه الخنقة دى اعمل ايه
العيال عاوزين وعاوزين وعاوزين واللى داخل على اد اللى رايح مش ملاحق عليهم مش عارف اعمل ايه
ثانوية ومذاكرة وقرف وبعد دا كله مش عارفة ادخل الامتحان كمان اعمل ايه
اعمل ايه بس قالى انه بيحبنى وميقدرش يعيش من غيرى فضعفت وسلمت له نفسى وحصل اللى حصل مش عارفة اودى وشى من الناس فين اعمل ايه
ماشية فى الشارع لا بيا ولا عليا هجموا عليا وخطفونى وعملوا اللى عملوه مبقتش طايقة الدنيا ولا عارفة اشوف حد ولا اتكلم مع حد ولا حد بيسمعنى اعمل ايه
كنت ناقشت هنا فى اكتر من بوست متتالى مجموعة من التقديمات لهذا الموضوع ذكرت فيها مجموعة من اشهر اماكن الانتحار اشهر المنتحرين ومجموعة  أخبار من حالات الانتحار الواقعية فى الفترة الاخيرة وكمان ذكرت قصة من اغرب قصص الانتحار اللى عرفها التاريخ ونشرت فيديو لحالة مضادة تماما يمكن نتعلم منه شئ   واللى يحب يرجع لها يلاقيها هنا 
هل الامر بهذه السهولة، 
انتظر لحظة الزهرة الميتة لن تتفتح مرة اخرى
تعلم من يوسف
اغرب قصة انتحار 
دلوقتى جه الوقت عشان اناقش معاكم الموضوع بشئ من التفصيل يمكن نكون سبب فى القضاء على المشكلة دى او تحجيمها وربنا يوفقنا كلنا للخير يارب .
طيب يعنى  ايه انتحار ؟
العلماء بيقولوا انه التصرف المتعمد من قبل الشخص لانهاء حياته وبعضهم قال انه قتل النفس تخلصا من الحياة والبعض قال ان الانتحار ثلاثة ابعاد هى رغبة فى القتل ثم رغبة فى الموت ثم رغبة فى أن يتم قتله وبعضهم قال انه عدوان تجاه الداخل 
وعالم آخر وضح بان الانتحار يختلط به عدد من الأحاسيس منها الانعزال اليأس والاكتئاب ويشعر بألم انفعالي لا يطاق ولا يوجد حل سوى الانتحار.
أما المدرسة المعرفية فقد رأت الانتحار برؤيا النفق أو التفكير غير المرن حيث أن الحياة مريعة ولا يوجد حل سوى الانتحار والبعض رأى الانتحار أنه تعبير عن البكاء الرمزي أو للفت الانتباه .
طيب ايه اللى بيخليهم ينتحروا او يفكروا فى الانتحار ؟
أسباب الانتحار
 العلماء بيقولوا  أن الانتحار ينتج عن تفاعل معقد لعوامل سببية معينة منها: الأمراض النفسية والعقلية، والفقر، والإدمان، والعزلة الاجتماعية، وفقدان عزيز، وصعوبات التواصل مع الآخرين، ومشكلات العمل، مما يستدعي توافر خبراء واختصاصيين في المجالات الطبية والصحة النفسية للتغلب على مشاعر الإحباط التي تدفع إلى الانتحار وقتل النفس وتقويم الأخطار وتوفير الخدمات الطارئة وسبل العلاج..
ويقول خبير الصحة النفسية بمنظمة الصحة العالمية "د.خوسيه مانويل برتولوني": إن ما بين 20 مليونا و60 مليون شخص يحاولون الانتحار سنويا، ينتحر منهم نحو نصف مليون حسب تقرير بثته وكالة "رويترز" مؤخراً، كما أن احتمال انتحار الأشخاص الذين يفقدون وظائفهم فجأة أكثر من احتمال انتحار الأشخاص الذين يعيشون في ظروف اجتماعية بائسة لفترات طويلة 
مجموعة علماء تانيين قالوا 
ويوجد للانتحار أسباب عضوية منها الوراثة أو نقص السيروتونين وهناك أسباب اجتماعية فسرها عالم الاجتماع الفرنسي إميل دوركايم حيث فسر الانتحار بسبب تكسر الروابط الاجتماعية والانعزال، وقد تؤثر عوامل الضغوط النفسية وعدم القدرة على كبحها وخاصة الفقر والبطالة.
وقد تكون هناك أسباب أخرى مثل ضعف الضمير وعدم القدرة على التكيف مع المجتمع وهنا تظهر فكرة إريك فروم حول الانتحار حيث الصراع بين الداخل والخارج وعدم الالتفات للعوامل الحضارية الاجتماعية. قد تباينت الردود على الانتحار ففي الهند واليابان يكون الانتحار مصدر شرف عندما تحترق الزوجة بجانب زوجه الميت أو مثل طياري الكاميكازي الانتحاريين ودى بيسموها النظرة الرمزية وبعض المجتمعات تجعل الانتحار كجريمة وخطيئة لا تغتفر، وعادة ما يشعر أقرباء المنتحر بالذنب والعار والهجر.
طب ايه كمان 
من أسباب الإنتحار أيضا إحداث خسائر بشرية ومادية بالخصم، فيقوم شخص أو أكثر باستعمال سلاح (متفجرات في معظم الأحيان) وقد يستعمل وسيلة نقل لتسهيل المهمة (كالسيارات المفخخة) لدخول منطقة الخصم وحتى يأتي الوقت والمكان المناسبين. قد توصف من قبل البعض بأعمال إرهابية غير أن بعض الأطراف الدينية والتحريرية يضفون عليها صبغة شرعية بصفتها من اجل تحرير الوطن أو من اجل الإنتقام لشخصية مهمة وغالبا يقوم بالانتحار الشخصيات الانهزامية واليائسة أو يقوم به بعض من يملكون الشجاعة وذلك بهدف معين منهم ودى اللى بيسموها العمليات الانتحارية .

طب ايه رأكم ناخد شوية ملاحظات سريعة ع الانتحار يالا بينا :-

الذين يحاولون الانتحار ثلاثة اضعاف المنتحرين فعليا
المنتحرون ثلاثة اضعاف القتلة
محاولات الانتحار عند الذكور اكثر من الاناث
الانتحار الفعلى أكثر بين الذكور
أكثر وسائل الانتحار استخداما عند الاناث الادوية والحرق وعند الذكور الاسلحة النارية
تقل نسبة الانتحار بين المتزوجين ومن لهم أطفال
اعلى نسبة انتحار فى العالم توجد فى الصين والهند
خمس المنتحرين يتركون علامات ورسائل تشير الى انتحارهم
تقل نسبة الانتحار فى الحروب والازمات العامة
طيب شوية احصائيات وارقام سريعة كدا عشان نشوف حجم المشكلة عامل ازاى  
حوالى 35% من حالات الانتحار ترجع الى امراض نفسية وعقلية كالاكتئاب والفصام والادمان
حوالى 65%الى عوامل مختلفة مثل التربية وثقافة المجتمع والمشاكل الاسرية او العاطفية او الدراسية والامراض المتنوعة  او تجنب العار او الايمان بفكرة القيام بالعمليات الانتحارية
ودا نتيجة تقرير منظمة الصحة العالمية اللى حددت العاشر من سبتمبر اليوم العالمى لمكافحة الانتحار بعد ما اثبت التقرير ان فى شخص بينتحر كل 40 ثانية وهو ما يمثل حوالي مليون وفاة تحدث سنوياً في العالم، ومن المتوقع أن يرتفع هذا العدد إلي 1.5 مليون بحلول عام 2020م وفى محاولة انتحار كل ثلاث ثوان وان دا منتشر بصورة كبيرة جدا فى المجتمعات الشيوعية ودا وفقا للاحصاء اللى هعرضه حالا 


البلد / نسبة الانتحار لكل 100.000 نسمة

  • ليثوانيا 42.0
  • روسيا 37.4
  • بيلوروسيا 35.
  • لاتفيا 34.3
  • أستونيا 33.2
  • هنغاريا 32.1
  • سلوفيتيا 30.9
  • أوكرانيا 29.4
  • كازاخستان 28.7
  • فلندا 24.3
خريطة توضح توزيع معدلات لالبتحار  في دول العالم..نلاحظ ان اللون الاحمر  والاصفر التى تدل على معدلات عالية من الانتحار   بعيدة تماما عن الدول العربية والاسلامية
أشارت آخر الإحصاءات إلى أن أكثر من )مليون شخص) يقدمون على قتل أنفسهم كل عام، وهي نسبة تفوق معدلات الوفاة الناجمة عن جرائم القتل العمد والحروب، فالانتحار هو السبب الرئيس للموت في أوساط المراهقين والبالغين دون سن ال35، كما أن الرجال يقدمون على الانتحار بمعدل يزيد عن ثلاثة أضعاف مما هو عليه عند النساء على عكس المعتقد خطأ ومع ذلك فإن معدلات الانتحار عند النساء أخذت في الارتفاع بشكل خطير في العقد الأخير!
وأشار الخبراء إلي أن الانتحار يشكل ما يقرب من نصف الوفيات العنيفة في العالم، إذ ظهرت حوالي 6003 حادثة انتحار ووفيات غامضة في بريطانيا وأيرلندا عام 2003م وهو ما يفوق عدد حوادث الطرق بأكثر من ثلاث مرات 
ولفت الخبراء إلى أن الانتحار هو أحد أكبر مشكلات الصحة العامة التي تودي بحياة الكثير من الناس في العالم، بصورة أكبر من حوادث الحروب والقتل العمد، مشيرين إلى أن حوادث الانتحار التي تظهر كل عام أكثر بثلاث مرات من ضحايا كارثة تسونامي التي ضربت جنوب شرق آسيا العام الماضي، وأكثر أيضاً من الأرواح التي حصدتها هجمات الحادي عشر من سبتمبر عام 2001م بمئات المرات 
تقول الإحصائيات أن أعلى نسبة للانتحار على الإطلاق كانت بين الملحدين واللادينيين
تؤكد هذه الدراسة العلمية أن أعلى نسبة للانتحار كانت بين الملحدين، ثم البوذيين ثم المسيحيين ثم الهندوس وأخيراً المسلمين الذين كانت نسبة الانتحار بينهم تقترب من الصفر. انظروا معي إلى العمود الذي يمثل نسبة الانتحار لدى الملحدين وهو أعلى نسبة لديهم، وتأملوا معي العمود الذي يمثل نسبة الانتحار بين المسلمين وهو أقل نسبة على الإطلاق، هل توحي لك هذه الحقيقة العلمية بشيء 
طب ايه تانى
اخبار الانتحار فى الوطن العربى وعلاج الانتحار
دا هيكون الموضوع القادم ان شاء الله فانتظرونى

27 رأيك يهمنى:

لـــولا وزهـــراء يقول...

ههههههههه طمنتي يا محمد ان من اسباب الانتحار الذين فقدوا وظائفهم فجاءه (:

اشكرك لانك خلتني ابحث عن الطيارين اليابانيون المدوعن الكيمكازي

هل العمليات اللي بيعملها الفلسطنيين تندرج تحت بند الانتحار؟ الشيوخ اتكلموا في الموضوع ده قبل كدا ؟

ربمنا يحمي شبابنا وشباب المسلمين
دايماً بتتحفنا ببوستاتك الجميلة (:
لولا

لـــولا وزهـــراء يقول...

يا حلاوة يا ولاااااد جدا انا كنت التعليق رقم واااااااااااااااااحد (:
الحمد لله
لولا

Carmen يقول...

المنتحر هو شخص يائس من حياته ومن نفسه ومن دينه
مناقشة رائعة تستحق كل التقدير
تحياتي وخالص احترامي كل التقدير
تحياتي وخالص احترامي

BNT ELISLAM يقول...

كتير جميل وحلو



فى انتظار الى جاى
وبعدان ماهو طبيعى لازم يبقى نسبه الانتحار فى الكفره اكتر هو ربنا هيسويهم بينا لازم يموتوا متاكدين انهم داخلين جهنم ربنا يسترها علينا
يارب

eng_semsem يقول...

جميل يا محمد الموضوع وفعلا اهم وازع بيمنع الانتحار هو الدين والتمسك بيه بس برده نقطة اللي اشارت ليها لولا بتاعت العمليات الاستشهاديه الفلسطينيه مفروض مش تندرج تحت اسم الانتحار اما كون واحد يفجر نفسه عشان خاطر فرد اخر او بداعي الانتقام ده قصه تانيه
تسلم ايديك
تحياتي

ليس فقيرا من يحب يقول...

طب انا مرة زمان كان عندنا مشكله عويصه اوى

وكنت يأست انها تتحل ومعرفش ليه من كتر الدنيا ماكانت غامقه اوى فكرت للحظه انى اموت نفسى فيتغير مسار الاحداث عن الطريق اللى كاانت ريحاله

استغفر الله العظيم مهنش عليا اخسر حياتى واخسر ربنا

الحمدلله على نعمه الاسلام

دينا كفيل انو يحفظنا من شطحات نفسنا الامارة بالسوء ويعصمنا

جزاك الله كل خير على تعبك فى انك تجمع الماده وانك تكتب بوست متكامل زى ده

ربنا يسعد ايامك

لبنى أحمد نور يقول...

تدوينة غنية وجميلة
في انتظار القادم :)

جارة القمر يقول...

مقال مهم و رائع و محدد الافكار

عجبنى اوى انك حاطط احصائيات

مش مجرد كلام توعية وبس

كدا يشد الناس اكتر و يمكن دا فعلا يقلل فكرة الانتحار

Nour Sherif Mohammad يقول...

مقال رائع D:
بس بالنسبة لي تقريبا رتبت خطة ل مستقبلي يكون الإنتحار فيها هو الباب الخلفي لو ماعرفتش أحقق اللي أنا عايزه لإن السكة اللي أنا عايزها مش مضمون آخرها ايه S:
وأنا مش شايف إن الموضوع وحش للدرجة.
وجودي مش ح يعمل فرق في العالم، بل العكس أنا شايف إني حمل زائد على الأُكسجين و موارد الكوكب.

norahaty يقول...

كانت هناك دراسة
تقول ان المنتحر
يكون خارج عقله
حينما يقدم على
الأنتحار اى أنه
يكون لا عقل له
فى لحظتها لأن
الروح والنفس عزيزة
جدا على صاحبها.
الحمد لله على نعمة
الإيمان والإســـلام

norahaty يقول...

كمان حاجة أعتقد
شىء -لكنى غير
متأكدة منه -
أن فى العقيدة
المسيحية لا يسمح
بأقامة صلاة أو تكريم
للمنتحر فى الكنيسة!

norahaty يقول...

على فكرةالتدوينة
برغم انها تتحدث
عن المــوت وكده
الأ انها حلوة

محمد الجرايحى يقول...

أكيد لابد أن تكون نسبة المسلمين هى الأقل
شكراً لك على الطرح القيم

The illusionist يقول...

محترم قوى قوى البوست ده

شكرا انك كتبت حاجه محترمه زى دى

مدونة رحلة حياه يقول...

لولا
شكرا على مرورك وتعليقك
اما بالنسبة للعمليات الانتحارية فانا مش بقدم هنا الرأى الفقهى لكن انا بقدمها من انواع قتل النفس المنتشرة

مدونة رحلة حياه يقول...

كارمن
شرفتينى يا افندم
انتظرك دوما

مدونة رحلة حياه يقول...

بنت الاسلام
ربنا يخليك دا من ذوقك
دومتى بخير

مدونة رحلة حياه يقول...

م اسامة
ربنا يعزك
ودا مش موضوع بعرض فيه راى الدين
دومت بخير

مدونة رحلة حياه يقول...

ليس فقيرا من يحب
جزاكم الله خيرا سيدتى وفعلا الوازع الدينى بيكون سبب فى حفظ الانسان من الوقوع فى الانتحار واشباهه

مدونة رحلة حياه يقول...

لبنى احمد نور
نورتينى يا افندم
لك خالص تقديرى

مدونة رحلة حياه يقول...

جارة القمر
اتمنى ان يكون لسلسلة المقالات صدى فعلا وتحقق الهدف من وراها
دومتى بخير

مدونة رحلة حياه يقول...

نور
ردى وصلك طبعا
حفظك الله بنى

مدونة رحلة حياه يقول...

د نورا
متشكر ليك وبشاركك الراى كمان وان شاء الله البوست الجديد نعرض فيه تعامل الديانات مع المنتحر
دومتى بخير

مدونة رحلة حياه يقول...

استاذى محمد الجرايحى
العفو يا افندم
اتمنى ان يوفقنى الله ال تقديم ما يفيد

مدونة رحلة حياه يقول...

The illusionist
الحمد لله انه عجبك ولو حضرتك بتتابع هتلاقى كل البوستات محترمة معندناش حاجة خادشة للحياء
دومت بخير

mrmr يقول...

ياريت اى حد مقبل على الانتحار يفكر جيدا نهايته ح تكون فين قبل ما يفكر انه ينهى حياته كده بسهوله

مجهود كبير دا يا محمد
ربنا يعوضك خير على تعبك

عقد الجمان يقول...

سبحانه الحاجة البشرية للإطمئنان إلى معبود لها تأثيرها في نسب الانتحار عند اللادينيين والملحدين ..
وتبقى درجة الإطمئنان التام لمن يعبودن الله ويؤمنون به وبه وبدار أخرى وعاقبة ..