بقايا انسان

على غير عادته جاء وجلس أمامى منكس الرأس يعلو الهم قسماته ثم تنهد قائلا :-

أنا تعبان قوى ومحتاج أتكلم معاك ؟ فصّمت فاعتبر ذلك موافقة منى 

هحكيلك حاجات كتير قوى عنى محدش يعرفها واللى يعرف هتلاقيه عارف جزء بسيط لكن أنا النهاردة ناوى احكيلك كل شئ ، هحكيلك عن الشيطان اللى جوايا ، اللى مستخبى فى قناع انسان ، هخليك تشوف وشى اللى الناس متعرفهوش معلش استحملنى أصله هم تقيل قوى على قلبى ومحتاج أفضفض يمكن لما أفضفض ارتاح شوية ......فصّمت 

كان عمرى لسه صغير وعودى أخضر طرى ميعرفش من الدنيا الا برائتها وكل حياته مذاكرته ، فجأة لقيت بنت جميلة بتشاور لى ، بتنادى علىَّ ، بتكلمنى ياااااااااااه اتكسفت قوى ووشى قلب أحمر ما هى أول مرة تحصلّى ، كنت بسمع من أصحابى فى المدرسة انهم متصاحبين على بنات وانا كنت بسيبهم واقعد بعيد ما انا مليش فى الكلام دا ، لكن البنت كملت وبقت تبعتلى وتكلمنى وبدأت شوية بشوية أرد عليها وزودت الكلام خلته كلام حب وكنت برد بس من غير ما اقول ولا كلمة حب وشوية وانتهى الموضوع وكل حى وراح لسبيله وربنا ستر وقدر انه يخلص بدون خسايرأكثر من أنه ذنب عايش جوايا لحد دلوقتى ودى حكايتى الاولى .

عدى وقت قول أكثر من سنة ودخلت الجامعه وبقى كل اهتمامى بمذاكرتى وعدت سنة اولى كدا اصحابى معدودين وكلهم اولاد وفى سنة تانية الامور اتغيرت شوية وبقى عندى زمايل اكتر ومنهم بنات كتير لكن معنديش فيهم حبيبة حتى البنت اللى أعجبت بيها طلعت مخطوبة وفى كل الاحوال كان فكرى اتغير واهتمامى بقى بالدراسة بس واتخرجت وبدأت رحلة الشغل وسنين مليش علاقة بحد بنت واحدة عرفتها بعد فترة كان بتشتغل فى مكان جنبى وكان اللى ما بينا سلام او سؤال عن احوال بعض ومرت سنين كتير ومعرفش عنها شئ من وقت ما سابت الشغل ، وعدى وقت تانى وبدأت اتعرف بالانترنت واشوف ناس بتقعد تكلم ناس واغلبهم بنات طبعا وكنت بشوف دا قدامى واستغرب ازاى بيحصل وبعد فترة من التعامل مع الانترنت بقى عندى اصحاب وبدأت اتعرف على ناس جديدة ونبقى اصحاب ومن بينهم كانت واحدة حكت لى شوية حاجات فساعدتها فيها وكان عندها مشكلة قدرت اساعدها تتخطاها ومن طول كلامنا مع بعض ومعرفتنا ببعض اتعلقنا ببعض وقررنا نتخطب ولكن القدر كانت تدابيره عكس دا فانقطعت السبل وكل حى راح لمصيره ودى حكايتى التانية.

واستمر التعامل والتعارف على الانترنت وعرفت ناس كتير واشكال اكتر ودى تقول بحبك ودى اقولها انا وبقى الموضوع تسليه تقريبا او قلة أدب منى أو مراهقة سميه زى ما تسميه المهم أن دا كان بيحصل ويتكرر مرة واتنين وتلاتة وصاحبك بقى روميو رغم انى مفيش فيا ولا صفة من مواصفات روميو وفى كل مرة البداية زى النهاية ودى حكايتى التالتة .

مبقتش الحكاية فى الانترنت بس لا دى خرجت لارض الواقع وبدأت اعرف ناس وطريقى بقى مضلم من كتر العك فيه .........شفت أنا أيه والناس بتشوفنى إيه........بس اهو على رأى المثل اللى ميعرفش يقول عدس 

طولت عليك بس كان هم تقيل على قليى وكان لازم اخرجه .

وتركنى وسار ومازلت على صمتى أحافظ ....هكذا صنعت مرآة اسمع فقط أظهر لك نفسك كما أنت .