السبت، 12 فبراير 2011

أم للدنيا

ابنوها وعلوها 
واوعوا فى يوم تبكوها 
 دى يا ما اتحملت قسوة 
 ودلوقتى فى ساعة نشوة 
 وخايفة يوم    فيه تنسوها 
 ابنوها وعلوها
دى ياما لكلهم مدت                 ايديها 
وعشانهم ياما اتظلمت            واديها
واديها لسه بتعلم 
 لاولادها وتتكلم 
 تضحك للكل وتسلم 
توصيهم يخلوها 
فى نن العين يشيلوها
 لأنى ام للدنيا 
 تعبت كتير من الفرقة  
وانا قلبى اتملى حرقة
عشان ولادى متفارقة
 بيمشوا كتير وانا  هبقى  
 لانى ام للدنيا 
ابنوها وعلوها 
واوعوا فى يوم تبكوها
اهداء الى الغالية فى كل القلوب مصر

24 رأيك يهمنى:

شهر زاد يقول...

رحلة مع الحياة
شفت الحخرية حلوة ازاي
بتخلينا نخرج الي في قلوبنا ونهتف باعلى صوتنا ونعرف قيمة الي في ادينا
دلوقت بس يا شباب مصر عرفتو قيمة امكم وحضنتوها زي مهي حضناكم
فعلا يا اخي
حطوها في نن عنكم
دي هي مصر
مصر ام الدنيا
يسلم قلمك يا مبدع الثورة
تحياتي

شهر زاد يقول...

اول مرة احظى باول تعليق
علشان كده حتسلطن واسرق تاني تعليق كمان
مادامت المناسبة فريدة من نوعها وجميلة
فانا حغتنم الفرصه واقول من تاني
تحيا مصر حرة ابية
تحيا مصر ام الدنيا

هبة فاروق يقول...

مبروك لمصر ام الدنيا مبروك لينا كلنا
يسلم قلمك وكلماتك الرائعة فى حب مصر

ماشي بنور الله يقول...

الف مليون مبروك
الحرية
الف مليون مبروك فجر جديد لنا ولكل العرب

لـــولا وزهـــراء يقول...

" جميلة جميلة جميلة جداً الكلمات ... ونفوجئ في الاخر بصورة جسدت معاني الحروف وجسدت الاحساس .. ام شايلة رضيعها وبتقولة في همسات.. وصية ارضنا لينا ومصر الام في الفرحة وف الازمات...

لو تبص يا محمد على الام وهي بتبوس ابنها وشايلاه بحنية هتحس للحظات انها بتهمسلة بكلمات الابيات والام هي مصر والابن هو احنا لسة مولودين وعمرنا يادوب لحظات ميلادنا من جديد وهي الحضن والاحتواء ..."


"لأنى ام للدنيا
تعبت كتير من الفرقة
وانا قلبى اتملى حرقة
عشان ولادى متفارقة"

دي بقى اكتر ابيات قعدت مشدودة ليها افكر فيها ...مصر بجد تعبت قوي واتحملت الام الحمل لحد ما اتولدنا من جديد وقلبها لسة محروق بنار فراق ابناء ليها ومش نسياهم وفكرت ياترى الفرقة اللي بتقول عليها فرقة الابناء اللي استشهدوا ولا فرقتنا احنا وعدم لمتنا مع بعضنا؟ مازال السؤال مطروح وبكرة هنعرف اجابته"

لولا

فاروق بن النيل يقول...

محمد متولى.............
إن شاء الله نبنيها بعرقنا زى ماخدنا حقوقنا بدمنا وحررنا مصر بشهدائنا

mallouk يقول...

ألف ألف مبروك لشعب المصري العزيز
وعقبى لباقي الشعوب المضطهدة
تحيتي ومودتي

المنشد أبو مجاهد الرنتيسي يقول...

بسم الله وبعد
يؤتي الملك من يشاء وينزع الملك ممن يشاء
اليوم ننجيك ببدنك لتكون لمن خلفك آية
نبارك لكم نصركم إخواننا في مصر الحبيبة ونسأل الله عز وجل بأن يرزقكم حاكما ربانيا يحكم بكتاب الله وسنة رسوله وأن يوفقهم إلى كل خير

أخوانك في الله
أبو مجاهد الرنتيسي
أحلام الرنتيسي

lossy❤❤ يقول...

لتملأ مصر صدرها بشهيق عميق

تأهباً لبداية نهاية أخرى

اكرم بشعب مصر..شعب قاهر المستحيل

re7ab.sale7 يقول...

كلامك برغم انه مش منظم شوية
يمكن عشان الانفعال من اللي حصل
واحساس باللي جاي
خايف من الي جاي زي ما انا وغيري كتير خايفين
بس ان شاء الله خير
واكيد اللي جاي مش هيكون أصعب من اللي فات
الاصعب فات وده المهم
تحياتي

نبع الغرام يقول...

نحمد الله على كل حال

مافيش احسن من الكلام اللى طالع كده من القلب
بس طالع مترتب وجميل يا محمد
مصر غاليه علينا
وهنحافظ عليها

يارب اللى جاى يكون احسن بفضل الله عز وجل
وياريت مش ننسا الشهداء يا من ضحيتم بحياتكم فى سبيل الله
ومن اجل تحرير اهلكم ووطنكم تحيه خالصة لكم فى ارقى مكان واكرم جوار

فى اعلى الجنان
وبجوار الرحمن وبالجنه تمرحون

وتحيه كبيره لجيش مصر العظيم الذى حمى الثوره منذ ان نزل الى الشوارع
وامن الناس والمؤسسات بعد انسحاب الشرطه

اجمل تحيه ليكى يا مصر

أم هريرة (lolocat) يقول...

السلام عليكم ورحمة الله


ابنوها وعلوها واوعوا فى يوم تبكوها

دى اهم فقرة فى كلماتك ودى اهم فكرة لازم تسيطر على عقولنا فى الوقت ده

عملنا ثورة وحققنا مطالبنا
وسقط النظام الفاسد
يبقى فاضل الاهم ...لان لو حصل فساد تانى هنكون احنا السبب اكيد لاننا سمحنا اننا نصفع مرة اخرى من جحر واحد
علشان كده لازم نحب بلدنا بجد ونحافظ عليها بجد بكل ما نقدر من طاقة نبنيها ولو اننا امطنا ورقة او طوبة بالطريق تضايق المارة
باى شىء بسيط نقدر نحافظ عليها

ان شاء الله الجاى اجمل وافضل علينا كلنا

الف الف مبرووووووووك لمصر
تحياتى لك اخى الكريم وتقديرى

اعقل مجنونه يقول...

بلادى بلادى بلادى

Noha Saleh يقول...

جميلة اوى بجد
كلام طالع من القلب
ان شاء الله هنبنيها ونعليها
وربنا يحفظ مصر

واحد من الناس يقول...

؟؟؟؟؟؟؟؟؟؟؟؟؟؟؟؟؟؟؟

حرّة من البلاد..! يقول...

والله حقكم ترفعوا رؤوسكم وتفتخروا ببلدكم وتعيشوا بحرية وكرامة
كلماتك تدل على حرصك وحبك لبلدك
تحياتي لك

OPENBOOK يقول...

السلام عليكم...
مبروك للشعب المصري ولكافة شعوب العالمين العربي والاسلامي...وايضا لشعوب العالم الحر ...انتصار الثورة المصرية الكبرى التي حققت اروع الانتصارات ضد اخر فرعون يحكم مصر...
الحرية للجميع...
دمتم بخير...

كلمات من نور يقول...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر

Bullet يقول...

رائعة!
ألف مبروك الحرية وهذه ان شاءالله أول خطوة في طريق الألف ميل الذي سيُعبد بهمتكم , بهمة شباب وشابات مصر ..
جد انتو رفعتو الرأس ..

لك ولكلماتك المؤثرة الف تحية ..

مصطفى سيف يقول...

جميلة اوي يا محمد
بجد مصر تستاهل اننا نخليها اعظم دولة في العالم
وتستاهل مننا كل حاجة نقدر نعملها علشانها
الف مليون مبروك لمصر
وتحياتي

queen silent يقول...

جميييييييييييييييييييييييييييييييل جدا

والله وطلعت فنان يابني :)

بس بصراحه مصر تستاهل اكتر من كداا كمان

ربنا يحميها ويعليها كمان وكمان


تحيا مصر تحياااا مصر تحيااااااا مصر


استمر >>

Casper يقول...

ما شاء الله عليك يا محمد
كلمات غاية في الروعة ذات إحساس صادق إلى أبعد الحدود

_______

حقاً علينا أن نحمي تراب هذا الوطن حتى تظل مصر دوما أم الدنيا

_________

خالص تقديري لفكرك وقلمك
بالتوفيق دائما
وفي انتظار المزيد من الابداعات

هذه أول زيارة للمدونة
وإن شاء الله لن تكون الأخيرة

تقبل مروري
Casper

حلم يقول...

الف مبروك لمصر ولكل المصريين

مدونة رحلة حياه يقول...

السلام عليكم
لكل اللى شرفونى وحبايبى وزمايلى واصحابى ولكل مدون جديد عندى لكنه استاذ لى لكم منى خالص الشكر على كلماتكم الجميلة فما كتبت الا تعتعة حروف فى حب مصر
شهرزاد- هبه فاروق- ماشى بنور الله - لولا - أ فاروق- مملوك - ابو مجاهد - لوسى - رحاب - ايناس - ام هريرة - اعقل عاقلة - نهى - واحد من الناس - حرة - openbook- كلمات من نور- بيلت - مصطفى - ضياء فجر - كاسبر - حلم - نورتونى