السبت، 3 سبتمبر 2011

الاغلبية الصامتة

الكلام النهاردة من الكلام السياسى المباح من اسمه سياسة رغم انه ممكن يكون خالى من السياسة رغم انه ميعرفش احزاب ولا تيارات ولا افكار ولا تكتلات ولا ائتلافات ولا غيرها .
متزعلش مش بتكلم عنك ولا عنك انا عارف انكم بتفهموا فى السياسة ومصطلحاتها اللى احيانا مش بعرف أقرأها ، انا بتكلم عنى وعن ابويا وامى وكل اللى زيهم الناس شديدى البساطة اللى كل اللى يعرفوه فى اللى بيحصل اننا دلوقتى من غير ريس وان فى ناس كتير عاوزة الكرسى دا بس هما مين ميعرفوش رغم انهم سمعوه فى التلفزيون كتير خالص اكتر من اعلاتات بيبسى وقطونيل .
بتكلم عن ناس مش بيشغلهم ابدا مصطلحات زى مدنية او ديمقراطية او شيوعية او رأسمالية او اشتراكية او دينية او غيرها او غيرها .............
بتكلم عن ناس بيكملوا نص عشاهم نوم عشان يلاقوا لقمة لبكرة مش ليهم لاولادهم ويمكن مش لاولادهم للطيور اللى مربينها ولما تسالهم يقولك دا طير اخرص يا ابنى مش هيصرخ ويقول جعان .بتكلم عن ناس بعض التيارات والصفحات ع شبكات التواصل الاجتماعى والجهاز الاعلامى وصفتهم بالجهل وانهم هيرجعوا البلد للايام البائدة وانهم مينفعش يتاخد رأيهم عشان مبيفهموش اصلا فلازم يبقى فى وصى عليهم يفكر مكانهم وكأن دول من طين ودول من طينة تانية ........
انا بكتب النهاردة وانا مصر أخرج عن العادى او الالتزام باى اسلوب ادبى فى الكتابة مش مهم النهاردة يكون البوست عربية فصحى او عامية بحتة او حتى كوكتيل عربى مشكل خليه كلام وتعبيرات تلقائية المهم أوصل صوت اللى مش بيتسمع لهم صوت .
كلنا بنقول حرية وعدالة اجتماعية بس هما فين ...... اصبر يا ابنى وربنا هيفرجها واللى جاى كويس واحلى ان شاء الله ... ربنا يسمع منك يا امى .
يا ابنى البلد والبلاد من حوالينا  اتملت بالبلطجية وتجار المخدرات وشوية العيال الصيع حتى اللى مكناش بنسمع لهم صوت بقى دلوقتى يبهدل فى الناس خير يا امى بيعملوا ايه ؟ بيقطعوا الطريق يا ابنى ع الرايح واللى جاى وبقينا حتى نخاف نخرج ونتأخر بعد صلاة العشا واللى عنده مشوار فى اى بلد تانية حتى لو جنبنا علطول بيخاف يروح بالليل ولو اضطر يروح او يكون راجع من سفر مثلا بيبقى شايل روحه على كفه وماشى ومش عارفين لما الدراسة تبدأ البنات والشباب حتى اللى بتسافر الكليات البعيد ويتأخروا فى الرجوع هيكون العمل معهم اية ؟
واحنا يا ابنى العربية اللى كنا بنسترزق عليها سرقوها مننا وضربوا الواد السواق بالرصاص واهو فى المستشفى ربنا يلطف بيه وبيقولوا لنا عاوزين ألافات كتير يا ابنى عشان يرجعوا العربية وهنجيب منين والعين بصيرة والايد قصيرة وياريتها حتى بترجع بحالتها ......
البلد اللى جنبنا اتخطف منهم كام بنت تحت تهديد السلاح واغتصبوهم يا ابنى ورموهم واهلهم بيموتوا عليهم  واللى كانوا ماشيين واتخطفوا واللى عرفوا يهربوا بس بعد ما بهدلوهم ضرب وتعذيب وغيره وغيره وغيره .........
وفلان يا ابنى كان رايح السوق يوصل جاموستين (متزعلوش من اللفظ ) لناس شارينهم قطعوا عليه الطريق وش الفجر وضربوه بالرصاص فى رجله وشرقوا العربيه باللى عليها وبيقولوا عاوزين 35 الف ودا بعد ما سابوا 10 الاف عشان يعالجوا الواد اللى اتضرب بالنار ......... يا سلام على طيبة قلبهم واخلاقهم الكريمة .
عارف يا ابنى عمك ...... بتاع الفراخ اه يا أمى عارفه سرقوا العربية بتاعته وضربوا الواد ابنه طلقتين فى رجله وفى جنبه واهو فى المستشفى وكمان بيقولوا لابوه عاوزين 50 الف عشان يرجعوا العربية .
وفى البلد اللى جنبنا اخدوا ميكروباص وضربوا صاحبه وطلبوا 36 الف عشان يرجعوه بعد ما اخدوا الكوتشات والكراسى كمان .
ايه يا أمى كل دا ؟ واكتر يا ابنى دا اليلد بقى ما يعلم بحالها الا ربنا .........
واللى زاد وعطا الكهرباء اللى كل يوم تقطع من المغرب لحد تانى يوم الصبح وان رأفوا بحالنا يجيبوها ع الساعة 2 بالليل والميه بقى انت عارف هى اصلا متعرفض حاجة اسمها نهار يعنى بعد نصل الليل نستناها عشان نملى الزير والبستلة عشان نلاقى شوية ميه نشرب منهم ونتوضى منهم .........
اما العيش بقى فالفرن اتقفل وحصته اتنقلت البلد اللى جنبنا وصاحب الفرن اللى اتنقل له الحصة بيدى لكل بيت من اللى يعرف ياخد اصلا 10 أرغفة بس مش اكتر يعنى ساعات كل واحد بيكون نصيبه فى اليوم اقل من رغيفين .........
حتى الزرع ي ابنى بيموت فى الارض عشان الترع والمصارف علطول ناشفة وتفرش وتنام فيها ........
عمك فلان يا ابنى لو عرفت تشوف له شغل يبقى هتكسب ثواب كبير ..... لية يا اما هو مش بيشتغل فى شركة ......... قفلوها يا ابنى وقعد وهو عنده كوم لحم ربنا يلطف بيهم ويعينه عليهم حاضر يا اما من عنيا 
وانت يا أبا اخبار شغلك ايه ..... والله يا ابنى بيقرفوا فين شهر يشيلوا الانتاج وشهر يقولوا مش عارف استقطاعات لايه وشهر المرتبات تتاخر بس الحمد لله على كل حال احنا احسن من غيرنا كتير ...... ربنا يعينك يا أبا ويمتعك بالصحة ويوسع رزقك .
احنا يا ابنى كل اللى عاوزينه نحس بالأمان فى بيتنا وشوارعنا منخافش على بناتنا لو خرجوا فى الشارع يشتروا طلبات فى اى وفت .
عاوز امشى انا وجارى عمك جرجس مع بعض ادخل انا الجامع وهو الكنيسة ونخرج مع بعض ونزور بعض ونود بعض زى ما اتعلمنا فى دينا يا ابنى ما ربنا بيقول فى كتابه  ( ولتجدنهم أقربهم مودة للذين ءامنوا الذين قالوا إنا نصارى )
عاوز الاقى مرتب يا ابنى يكفى البيت والعلاج والتعليم والدروس وانت عارف المدارس ع الابواب ومفيش حتى نجيب هدوم المدرسة للعيال .
أما أنا بقى عاوز الاقى فصلى فى المدرسة نظيف واتعلم كويس عشان عاوزة ابقى دكتورة .... ان شاء الله يا حبيبتى ذاكرى انتى بس وقولى يارب .
وانا يا عمو عاوز اعلم الناس كل حاجة واساعد كل الناس والكل يقابلنى وهو مبسوط وبيضحك زى ما بيقابلوك يا عمو .... ان شاء الله حبيبى يقابلوك احسن ما بيقابلوا عمك كمان .
احنا مش فارقة معنا مسميات مش فارقة معنا اشكال عاوزين امان ولقمة عيش وهدمة نظيفة وباب يتقفل علينا ورئيس ووزارة تتقى ربنا فينا وكل واحد يتحط فى المكان اللى يستحقه واللى يمشى ع الغنى يمشى ع الفقير والقوى زيه زى الضعيف مفيش ابن باشا ولا بيه ولا ابن غفير عاوزين مصر الطيبة عاوزين ادخلوها أمنين عاوزين عيشوا فيها أمنين مش فارقة معنا موسى من برادعى من بسطويسى من ابواسماعيل مادام فى قانون ورقابة بتتطبق على اللى يرأسنا قبل ما تتطبق علينا كمحكومين عاوزين نمشى راسنا مرفوعة ولازم تكون مرفوعة ما احنا مصريين .


" ونحنا.. نحنا هون من غزة عايزين لما ينقص العلاج نقدر ناخد تحويلة لمصر بسرعة ونلاقي المعبر فاتح ومفيش امن مصري يشخط فينا ويضرب شبابنا .. حتى المريض ما كانوا يرحموه .. عايزين لما اولادنا بدهم يتعلموا يلاقوا جامعات مصر مفتوحة ليهم زي ماالكل العرب بتدرس في مصر ولادنا برضه لهم حقهم..
عايزين مصر تكون معنا ضد الاحتلال مو ضدنا مع الاحتلال.. عايزين لما نحتاج الغاز ما ناخده من عدونا بأسعار مضاعفة عشرات المرات وهم ياخدوه من مصر بالمجان.. عايزين لما نور بيوتنا السد العالي يدعمنا.. عايزين قطز
عايزين أمن .. عايزين نصر..
عايزين خير جند الارض...
عايزين نكون يد واحدة .. عايزين نكون عرب مسلمين همنا واحد ونصرنا واحد"

هاد حلم المواطن الفلسطيني البسيط
ضفه إلى احلامكم البريئة...

عاشت مصر حرة
وعاشت فلسطين حرة

تحيتي
(زينة زيدان )



26 رأيك يهمنى:

افروديت يقول...

بوست أكتر من رائع

اكتر جمله لفتت نظري فيه "احنا مش فارقة معنا مسميات مش فارقة معنا اشكال عاوزين امان ولقمة عيش وهدمة نظيفة وباب يتقفل علينا ورئيس ووزارة تتقى ربنا فينا"


محمد كلامك منطقي جدآ وصواب ودالسان حال ناس كتير خاصة دلوقتي ..وكمان في عصر مبارك
لكن يعني ايه مش فارقه معانا مسميات لازم تفرق معانا عشان لازم الناس تفهم
لو الانسان البسيط مش فاهم معني كلمة "شيعي " أو "وهابي" هيبقي سهل ينضم ليهم ويدخل ويشارك معاهم بما أن كل همه لقمة وهدمه نضيفه

كنت دايمآ بقول اننا هنثور عشان الفقر والجوع والمرض لكن اماحصلت ثورة والكل أنضم لاقيت الغني بيشارك قبل الفقير لاقيت ناس بسيطة جدآ ومثقفين وهواه في مختلف المجالات في ميادين مصر
قبل ما بطلب عيشه هنيه
أنا عايزه احس بالحريه

وحكايه اننانمشي براسنا مرفوعه دي هتتحدد في الانتخابات متهيألي لوخلت من التزويروطبعآ اشك في ده جدآ
امانشوف الريس الجاي ربنايسهل

بحيك ع البوست جدآآآ

الغاردينيا يقول...

السلام عليكم :)
هذا صوت البسطاء و هو صوت عربي وطني بالمناسبة فذات الصوت اسمعة هنا في اليمن
و ستمسعه ليبيا عماقريب والخ الخ

يؤسفني كل هذا و تقريبا هذه هي نفس المشاكل التي نعاني منها كالهرباء والماء و القتل و التعامل مع الرصاص كأنه لعبة
تستخدمها وقتما شئت بلا حسيب او رقيب

لا اعرف ما اذا أقول اكثر من هذا سوى
لنا الله ولعل الغد يصبح أجمل
و يشرق على وظننا العربي و يعم الأمان
تحية استاذي

sony2000 يقول...

دا صوت المصريين

بس هنلاقي الحل ازاي؟

Chaimae Ali يقول...

السلام عليكم و رحمة الله
في الفترة الاخيرة دي قريت اكتر من بوست في المدونات كانت بتعالج قضايا سياسية عن المشاكل اللي بتمر بيها مصر بعد الثورة و بلدان عربية شقيقة كانت بوستات مميزة و فيها تحليلات منطقية و عميقة جدا .
في البوست بتاعك ده يا متولي انا مشفوفتش مشاكل اجتماعية خطييرة جداا تهدد امن و استقرار البلد في مصر بس انما في كتير من دول العالم العربي .. فئة مهمشة تماما يتم التكتم عنها و التستر على المصايب اللي بتحصلها كل دقيقة و اللي زي ما قولت مش فاهمة حاجة اصلا من اللي بيحصل حواليها ناس ملهاش ذنب غير انها عايشة بدقة بتفكر في قوت يومها بس و ملهاش دهوة لا بخلافات طائفية و لا احزاب و لا كل المصطلحات الجديدة اللي ظهرت في الفترة الماضية ,
ربنا يلطف بيهم و بينا ده اللي اقدر اقوله .
تسلم ايدك يا متولي

mrmr يقول...

رائع رائع رائع
حقيقى دا صوت كتير من شعب مصر
كلام واقعى جدا
تسلم ايديك يا محمد
ربى يسعدك

Unknown يقول...

فعلا تدوينة ممتازة
وأكثر من ممتازة
تصف أغلبية
شعبنا
الصــامتة
المغلوبة على
أمرها أبد الدهر ومش
عايزة حاجة الأ الستر فى
العيشة فهل يرضى أولى الأمر
وينفذوا لهم هذا الطلب؟!

مصطفى سيف الدين يقول...

مفيش شك ان الثورة اثرت على ناس كتير بسيطة بالسلب
مفيش شك ان الامن غايب
مفيش شك ان الاحوال الاقتصادية بتتدهور
بس مين السبب ؟
مش المتظاهرين ولا المعتصمين السبب المجلس العسكري و حكومة شرف اللي خلى الناس لسه فاكرين ان الثورة محققتش حاجة
نفسي الانتخابات والدستور يخلصوا ييجي رئيس جديد
نفسي الناس تثق في الامن والشرطة
نفسي مبارك وكل قتلة الشهداء يتحاكموا
قبل كل ده ستظل الاغلبية الصامتة قانطة
تحياتي لمقالك وقلمك المتميز

المورقة عبير !! يقول...

السلام عليكم
بعد ماقرأته هنا اعتقد اني لااقدر أن اضيف شيءً ..

لأنه واقع لأن الاغلبية صامتة

ونتنظر الحل ليس في مصر فقط بل ربما في كل مكان ..

مازال الصمت يخيم على ارواحنا ننتظر حلاً ..

حلاً يجعلنا نعيش بكرامة ..

نعود للحياة الآمنة ..

لا يهم من سيجلس على الكرسي . ولكن المهم متى تعود الحياة

دمت بخير ودامت بلدك بخير

زينة زيدان يقول...

اخي محمد

أضف الى رسالتك صادقة النبض والمحتوى هذه الرسالة من ناس غزة..

" ونحنا.. نحنا هون من غزة عايزين لما ينقص العلاج نقدر ناخد تحويلة لمصر بسرعة ونلاقي المعبر فاتح ومفيش امن مصري يشخط فينا ويضرب شبابنا .. حتى المريض ما كانوا يرحموه .. عايزين لما اولادنا بدهم يتعلموا يلاقوا جامعات مصر مفتوحة ليهم زي ماالكل العرب بتدرس في مصر ولادنا برضه لهم حقهم..
عايزين مصر تكون معنا ضد الاحتلال مو ضدنا مع الاحتلال.. عايزين لما نحتاج الغاز ما ناخده من عدونا بأسعار مضاعفة عشرات المرات وهم ياخدوه من مصر بالمجان.. عايزين لما نور بيوتنا السد العالي يدعمنا.. عايزين قطز
عايزين أمن .. عايزين نصر..
عايزين خير جند الارض...
عايزين نكون يد واحدة .. عايزين نكون عرب مسلمين همنا واحد ونصرنا واحد"

هاد حلم المواطن الفلسطيني البسيط
ضفه إلى احلامكم البريئة...

عاشت مصر حرة
وعاشت فلسطين حرة

تحيتي

Haytham Kilany يقول...

بكل بساطه انت لمست الواقع ولمست الحلم
لسه زمايلى مروحين من الشغل طلع بلطجيه ثبتوهم واخدوا فلوسهم والعربيه وطلبوا 30 الف علشان يرجعوا العربيه

وسيبك انت من الخناقات الاتلافات والاحزاب
يافرحتى الاخوان هيمسكوا البلد
طب وبعدين
اوافقك الرأى عايزين
عيش ...حريه .... عداله اجتماعيه

رحاب صالح يقول...

مساء الورد يا محمد
لاول مرة مكملش البوست عندك
وانت اكيد عارف السبب
بس بجد لسة في كتير متقلش ولسة كتير هنقوله
ولسة كتير عايزين نعمله
ولسة البلد عايزة تنضف
انت عارف السحلية لما يتقطع ديلها برضه بتفضل عايشة حية ...وديلها بيعيش برضه فترة تانية
اهي هي دي بلدنا واللي حاصل فيها
متقتلش الفساد ...تقطع بس ...وفضل حي زي ما هو
ربنا يستر

زينة زيدان يقول...

أخي محمد
أشكر اضافتك لرسالتنا
واشكر ايصالك لصوت البسطاء
تحيتي لك

مدونة رحلة حياه يقول...

السلام عليكم
افروديت حمدالله ع سلامتك منورة المدونة
طبعا موافق على رأيك بس احنا مش بنتكلم فى مصطلحات دينية لان الدين عند الناس خط احمر لكن بنتكلم فى سياسة وامال وطموحات ناس قاست كتير اوجاع وهو دا لسان حالهم اللى سمعته منهم وعشتهم معهم
شكرا لك

مدونة رحلة حياه يقول...

وعليكم السلام غاردينيا
للاسف فعلا هو دا حال بلادنا العربية فى التوقيت دا وتقريبا نفس المشاكل متكررة ونفس اسلوب علاجها والتعامل معها من الانطمة الحاكمة متماثل تماما
عسى القادم ان يكون افضل ان شاء الله
دومتى بخير

مدونة رحلة حياه يقول...

سونى الحل واضح ومعروف
الشرطة تؤدى دورها المنوط بيها القيام بيه
والجيش يسلم السلطة لمن يحكم البلد من خلال اجراء الانتخابات التشريعية والرئاسية وعدم التطويل والمماطلة
ودا هيقضى على حاجات كتيرة من اللى بتحصل وهيرجع هيبة الدولة تدريجيا

مدونة رحلة حياه يقول...

وعليكم السلام شيماء
هى دى فعلا المشاكل اللى بتحصل فى بلادنا وللاسف بنديها ضهرنا وكأنها متخصناش احنا لازم نتلسع بالنار عشان نبدأ نطفيها
ياريت نتعلم
شكرا شيماء

مدونة رحلة حياه يقول...

مرمر
ربنا يخليك
منورة دايما

مدونة رحلة حياه يقول...

الطلب بسيط يا دكتورة نورا
بس مين يسمع واللى بيسمع دا امتى هينفذ
ولو نفذ هيكون فى صالح مين
دومتى بخير دكتورة

مدونة رحلة حياه يقول...

مصطفى سيف
انا مش قصدى اسئ ابدا للثورة ومش قصدى ان هى السبب
التمادى اللى بيحصل فى الوقت والمماطلة فى تنفيذ المطالب واحجام الشرطة عن القيام بدورها دى اسباب بتوصلنا للى بيحصل دا وكمان غياب العادلة وعدم اصدار قرارت تطبق على الجميع بمساواة
وفى غيرها كتير

مدونة رحلة حياه يقول...

عبير الربيعى
وعليكم السلام
للاسف الكراسى بتعمى العيون دايما عن اوجاع الناس بس ادينا بنحاول نتكلم ونتكلم ونتكلم يمكن حد يسمع ويبص
دومتى بود

مدونة رحلة حياه يقول...

زينة زيدان
شكرا لك اختى
فهمنا واحد ووطنا واحد وجرحنا واحد

مدونة رحلة حياه يقول...

هيثم الكيلانى
نورت مدونتى يا افندم
انا مجبتش جديد يا هيثم
انا شفت نبض الناس ونقلته
ربنا يصلح الامور والاحوال

مدونة رحلة حياه يقول...

رحاب صالح
مساءك سعيد ان شاء الله
جميل قوى تشبيهك يا رحاب
للاسف اللى زاد وغطى ان فى ناس مكانوش فاسدين بس كان عندهم ميول للفساد دلوقتى الوقت صالح لهم حتى صاروا اشد افسادا من خبراء الفساد ذاتهم عشان وفرتى لهم البيئة والتربة الخصبة اللى بتنفع ينثروا فيها سمومهم
دومتى بخير

فاروق سحير ( فاروق بن النيل ) يقول...

محمد متولى.............
تحليلك ونقلك لمشاعر الناس وماحصل لهم لأسباب كثيرة :
1- تراكمات سنوات من ذل وفقر وقهر
2- إنتقام ممن ظلم وعذب وسجن بريئا
3- أناس لهم حق بمعيشة فاضلة ماوجدوها
4- أسرفقدت أبناءهاباحثة عن لقمة عيش
5-أناس كانوالايملكون أصبحوامليارديرات
6- سوء توزيع الدخل على الشعب
7- خريجون لم يجدواعملوا ليساعدوا زويهم
8- فقدالشباب الأمل بالزواج لسوءالحال
9-السرقةوالنفاق أصبح السائد بالبلد
10-الأراضى تباع بملاليم لتتحول لثروات
لوخلطت كل ذلك وطحنته سيخر منه واحد إسمه حسنى مبارك
الفائدة التى كان يجنيها المستفيدون هى التى تحدث الفوضى الآن والزمن والصر كفيلان بحل هذه المعضلة إن شاء الله

فاروق سحير ( فاروق بن النيل ) يقول...
أزال المؤلف هذا التعليق.
مدونة رحلة حياه يقول...

م فاروق
متشكر ليك وفعلا عند حضرتك حق
بس مينفعش نهمل مطالب الناس دى ولازم نتكلم ونعبر عنها
شكرا لك سيدى